اپوزیشن لیڈر شہباز شریف نے کہا ہے کہ کورونا وائرس کی اس وبا کے دوران  وزیراعظم کا عوام کے نزدیک یہ رویہ افسوسناک ہے۔

‎تفصیلات کے مطابق پاکستان مسلم لیگ (ن) کے صدر اورقائد حزب اختلاف شہبازشریف نے یوم تکبیر پر خطاب کرتے ہوئے کہا کہ ملک میں اب تک کورونا وائرس کی وجہ سے لاکھوں لوگ بے روزگار ہوگئے ہیں لیکن حکومت کو کسی چیز کا علم نہیں ہے۔

انہوں نے کہا کہ کنفیوژن کا شکار وزیراعظم عمران خان کی جانب سے کورونا وائرس پر بھی قوم کو متحد نہیں کیا جاسکا ہے، ن لیگ سیاست نہیں کرنا چاہتی لیکن حقائق پر پردہ نہیں ڈال سکتے ہیں۔

یوم تکبیر کے متعلق اپنے خطاب میں انہوں نے کہا کہ آج کا دن ہمیں 22 برس قبل کے اس ناقابل فراموش دن کی یاد دلاتا ہے جب پوری قوم نے یکسو اور ایک آواز ہوکر ایک فیصلہ کیا تھا جو تاریخ کے سینے پر پاکستانی قوم کے عزم وہمت کا انمٹ نشان بن گیا۔

شہباز شریف کا کہنا تھا کہ جناب ذوالفقار علی بھٹو سے شروع ہونے والا قومی سلامتی ودفاع کی امانت کا سفرمختلف قیادتوں، حکومتوں سے ہوتا، سائنسدانوں، انجینئرز، افواج پاکستان سب کی اجتماعی کاوشوں کا ثمر اَوجِ کَمال کو پہنچا اور ‎ُاس وقت کے وزیراعظم جناب محمد نوازشریف کے حصے میں قدرت نے یہ خوش بختی لکھی کہ انہوں نے پوری قوم کے جذبات واحساسات کی ترجمانی کرتے ہوئے جرات واستقامت کے ساتھ ایٹمی دھماکے کرنے کا تاریخی فیصلہ کیا۔

انہوں نے کہا کہ یہ وہ دن ہے جس روز پاکستان نے بھارت کے 5 ایٹمی دھماکوں کا جواب 6 ایٹمی دھماکے کرکے دیا تھا اور اس طرح پاکستان دنیا کی ساتویں اور عالم اسلام کی پہلی ایٹمی قوت بن گیا۔