کوئٹہ میں آئل ٹینکر الٹنے کے باعث لگنے والی آگ سے راکھ کا ڈھیر بننے والی دکانوں کی تعداد50ہوگئی جبکہ حادثے میں 5 افراد زخمی ہوئے ہیں۔

تفصیلات کے مطابق کوئٹہ کے علاقے نیو سریاب میں آئل ٹینکر اُلٹ گیا جس کے بعد شدید آتشزدگی نے اطراف کو اپنی لپیٹ میں لے لیا، آگ بجھانے کی کوششوں کے دوران 8 افراد جھلس گئے۔

پولیس کے مطابق سریاب کے علاقے کسٹم میں آئل ٹینکر بے قابو ہوکر الٹ گیا، آئل ٹینکرکے الٹنے اورتیل بہنے کے باعث بڑے علاقے میں آگ پھیل گئی ،جس نے قریبی دکانوں کو بھی  لپیٹ میں لے لیا۔

واقعے کے بعد فائر بریگیڈ کی 6 گاڑیاں اور 3 واٹر ٹینکرز جائےوقعہ پر پہنچ گئے اور 2 گھنٹے کی کوششوں کے بعد رات گئے آگ پر قابو پالیا گیا۔

متاثرین کا کہنا ہے کہ آگ پر بروقت قابو نہ پانے سے کروڑوں کا نقصان ہوا ہے اور مطالبہ کیا ہے کہ نقصان ہونے والے تاجرروں کیلئے صوبائی حکومت پیکج کا اعلان کریں۔

دوسری جانب فائر بریگیڈ کا کہنا ہے کہ عملے نےآگ کو آبادی تک بڑھنے سے روکا گیا تھا۔