آرمی چیف جنرل قمر جاوید باجوہ نے پاکستان مسلم لیگ (ن) کے صدر اور قائد حزب اختلاف شہبازشریف کو ٹیلی فون کر کے ان کی صحت دریافت کی۔

ٹیلی فون رابطہ میں بات چیت کے دوران آرمی چیف نے شہبازشریف سے ان کی صحت سے متعلق خیریت دریافت کی جبکہ شہبازشریف کی مزاج پرسی اور کورونا پازیٹو ہونے پر تشویش کا اظہار کیا ۔

ترجمان ن لیگ کا کہنا ہے کہ رابطہ میں بات چیت کے دوران آرمی چیف نے شہبازشریف کی صحت یابی کی دعا، علاج معالجے میں معاونت کا بھی پوچھا۔

یاد رہے کہ قومی اسمبلی میں قائد حزب اختلاف شہباز شریف بھی کورونا وائرس کا شکار ہوگئے۔

لیگی رہنما عطاء اللہ تارڑ نے قوم سے شہباز شریف کی جلد صحتیابی کے لئے دعا کی ہے۔

شہبازشریف کا کورونا ٹیسٹ آگیا

مسلم لیگ ن کی ترجمان مریم اورنگزیب کے مطابق شہباز شریف بار بار کورونا کے ٹیسٹ کرا رہے تھے، وہ ڈاکٹروں کی ہدایات پر عمل کر رہے ہیں۔

شہباز شریف کے کورونا ٹیسٹ مثبت آنے پر بیان میں فیاض الحسن چوہان نے کہا تھا کہ کورونا میں مبتلا دیگر لیگی قائدین کے لیے بھی جلد صحتیابی کی دعا کرتے ہیں۔

انہوں نے کہا تھا شہباز شریف کا صحت مند رہنا پاکستان اور پاکستانی عوام کے لیے بڑا ضروری ہے، امید ہے شہباز شریف قرنطینہ کے بعد کورونا کے خلاف عملی اقدامات میں بڑھ چڑھ کر حصہ لیں گے۔