ملک بھر میں فرنٹ لائن فائیٹرز پر کورونا کے وار مزید تیز ہوگئے، گزشتہ 24 گھنٹوں میں مزید 104 ہیلتھ کئیر متاثر, 5 جان کی بازی ہار گئے ہیں۔

تفصیلات کے مطابق عالمی وبا کورونا سے سب سے زیادہ متاثر اب تک فرنٹ لائن ہیلتھ ورکرز ہوئے ہیں، نیشنل ایمرجنسی آپریشن سینٹر نے رپورٹ جاری کر دی۔

نیشنل ایمرجنسی آپریشن سینٹر کی رپورٹ کے مطابق ملک میں کورونا سے متاثرہ ہیلتھ کئیر ورکرز کی تعداد 4959 تک پہنچ گئی، متاثرہ ہیلتھ کئیر ورکرز میں 975 کریٹکل کئیر یونٹ اور 3984 دیگر وارڈز میں ڈیوٹی سرانجام دے رہے تھے۔

رپورٹ میں کہا گیا ہے کہ ملک میں مزید 51 ڈاکٹر کورونا سے متاثر, مجموعی تعداد 3001 ہو چکی ہے جبکہ مجموعی طور پر 602 نرسز اور 1356 دیگر اسپتال ملازمین  کورونا کا شکار ہوگئے ہیں۔

کورونا وائرس سے متاثر ہونے والے فرنٹ لائن ہیلتھ ورکرز کی تعداد 4 ہزار سے تجاوز کر گئی

رپورٹ میں یہ بھی کہا گیا ہے کہ کورونا وائرس کا شکار 290 ہیلتھ پروفیشنلز اسپتالوں میں زیرعلاج ہے اور 2477 ہیلتھ کئیر پروفیشنل گھروں اور دیگر مقامات پر قرنطینہ ہیں

نیشنل ایمرجنسی آپریشن سینٹر کی رپورٹ میں مزید کہا گیا ہے کہ ملک میں کورونا سے اب تک 2139 ہیلتھ پروفیشنلز صحتیاب ہو چکے ہیں جبکہ کورونا وائرس میں مبتلا 4 ہیلتھ پروفیشنلز کی حالت تشویشناک ہے۔