وزیر اعظم آفس اور ہاوس کے اخراجات میں 21 فیصد کی ریکارڈ کمی ہوئی ہے۔

وزیراعظم آفس کے مطابق بجٹ میں مختص فنڈ میں سے 18 کروڑ کی بچت نے سادگی کی مثال قائم کی ہے۔

معاون خصوصی شہباز گل نے وزیر اعظم ہاؤس اور آفس کے اخراجات میں نمایاں کمی پر بیان میں کہا کہ وزیر اعظم ہاؤس اور آفس کے اخراجات میں نمایاں کمی کی گئی، مختص فنڈز میں سے 18 کروڑ 37 لاکھ روپے وزارت خزانہ کو واپس کئے گئے۔ ٹیکس کے پیسے کے ذمہ داری اور ایمانداری سے استعمال کی عمدہ مثال قائم کی۔

معاون خصوصی نے کہا کہ وزیر اعظم سیکرٹریٹ کفایت شعاری میں تمام 34 وفاقی وزارتوں اور 44 ڈویژنز پر بازی لے گیا۔

وزیر اعظم آفس کے ملازمین کو گھروں سے کام کرنے کی ہدایت

شہباز گل نے یہ بھی کہا کہ 2019 میں وزیراعظم آفس و ہاؤس کے لیے مختص 86 کروڑ 28 لاکھ روپے میں سے 67 کروڑ 92 لاکھ روپے کے اخراجات ہوئے جب کہ آئندہ مالی سال 21-2020 کے لیے بھی لگ بھگ 86 کروڑ روپے مختص کیے گئے ہیں۔

معاون خصوصی شہباز گل نے مزید کہا کہ پچھلے سال وزیراعظم ہاؤس کے اخراجات میں 41 فیصد کمی کی گئی تھی اور رواں مالی سال وزیراعظم آفس و ہاؤس نے اخراجات میں 21 فیصد تک ریکارڈ کمی کرکے کفایت شعاری کی مثال قائم کی ہے جبکہ اخراجات میں کمی کی اس روایت کو آئندہ سالوں میں بھی قائم رکھا جائے گا۔