امیر جماعت اسلامی سینیٹر سراج الحق نے کہا ہے کہ ہم ایک پرامن اور خوشحال افغانستان چاہتے ہیں اور بین الافغان مذاکرات کو سپورٹ کرتے ہیں۔

تفصیلات کے مطابق افغان سفیر شکراللہ عاطف مشعل کی امیر جماعت اسلامی سینیٹر سراج الحق سے ملاقات ہوئی ہے۔

ملاقات میں سراج الحق نے کہا ہے کہ افغانستان کی تمام جماعتیں اور قیادت ایک میز پر بیٹھ جائیں اور باہمی اختلافات کو بات چیت سے حل کریں۔

ان کا کہنا تھا کہ خطے سے امریکی افواج کا انخلاء افغان عوام کی بہت بڑی فتح ہے لیکن جماعت اسلامی نے ہمیشہ افغان عوام کے دکھ دردکو اپنا دکھ درد سمجھتے ہوئے اس میں شرکت کی ہے۔

سینیٹر سراج الحق نے کہا کہ پاکستان کی ترقی و خوشحالی کیلئے بھی پرامن افغانستان کی ضرورت ہے لیکن کابل میں ہندوستان کا سازشی کرداردونوں برادر اسلامی ممالک کے کیلئے نقصان دہ ہے ۔