متحدہ اپوزیشن نے مطالبہ کیا ہے کہ صدر ڈاکٹر عارف علوی اور وزیر اعظم عمران خان استعفیٰ دیں۔

تفصیلات کے مطابق پاکستان مسلم لیگ (ن)، پاکستان پیپلز پارٹی، عوامی نیشنل پارٹی (اے۔این۔پی)، جمیعت علماء اسلام (ف)، جماعت اسلامی، قومی وطن پارٹی، میر حاصل خان برنجو کی نیشنل پارٹی نے مشترکہ بیان جاری کیا ہے۔

متحدہ اپوزیشن نے جسٹس قاضی فائز عیسیٰ کے خلاف صدارتی ریفرنس کالعدم قرار دینے پر سپریم کورٹ کے فیصلے کا خیرمقدم کیا ہے اور کہا ہے کہ پوری قوم کا مطالبہ ہے کہ غیر آئینی، غیر قانونی، جھوٹا اور بدنیتی پر مبنی ریفرنس بنانے والے صدر ڈاکٹر عارف علوی اور وزیر اعظم عمران خان استعفیٰ دیں۔

اپوزیشن کا کہنا تھا ایسٹ ریکوری یونٹ کی حقیقت قوم کے سامنے آچکی ہے، سپریم کورٹ کے فیصلے کی روشنی میں اسے فی الفور بند کیا جائے کیونکہ ایک معزز جج کے خلاف بدنیتی پر مبنی بے بنیاد ریفرنس بنا کر اعلی عدلیہ کو بدنام کرنے کی کوشش کی گئی تھی۔

ان کا کہنا تھا کہ ریفرنس دراصل اعلی عدلیہ کا بازو مروڑنے اور اسے دباو میں لانے کی مذموم کوشش تھی لیکن آج ملک بھر کی وکلاء برادری کو مبارک پیش کرتے ہیں کہ ان کے اتحاد اور عزم کے سامنے فسطائی سوچ ڈھیر ہوگئی اور اس کے ساتھ ہی پاکستان بار کونسل، صوبائی بار کونسلز کو ان کے شاندار کردار پر خراج تحسین پیش کرتے ہیں۔

اپوزیشن اتحاد کا کہنا تھا کہ وکلا برادری نے ایک بار پھر ایک نازک موڑ پر تاریخی کردار ادا کیا ہے اور آج سچائی، ایمانداری، قانون و انصاف کی حکمرانی اور اتحاد کی جیت ہوئی ہے اور اس کے ساتھ ہی عدلیہ کے خلاف سازش ناکام ہوئی ہے اور عمران خان کی ذہنیت سامنے آگئی ہے۔

اپوزیشن نے بتایا کہ سپریم کورٹ کے فیصلے نے حکومتی بدنیتی بے نقاب کر دی ہے جس کے بعد موجودہ حکومت کی ناکامیوں کی طویل فہرست میں آج ایک اور اضافہ ہو گیا ہے۔