گھوسٹ اسکولوں اور گھوسٹ سڑکوں کے بعد اب گھوسٹ پائلٹس بھی سامنے آگئے۔

پاکستان ایئر لائن (پی آئی اے) میں چار پائلٹس کا بغیر ڈیوٹی دئیے گھر بیٹھے تنخواہیں اور مراعات لینے کا انکشاف ہوا ہے۔

ذرائع کا کہنا ہے کہ  پی آئی اے حکام نے ڈیوٹی دئیے بغیر تنخواہیں لینے والے  چار پائلٹس کے خلاف کاروائی کا آغاز کردیا ہے۔چاروں پائلٹس کو نوکریوں سے برخاست کرنے کی کارروائی شروع  کردی گئی ہے۔

چاروں پائلٹس نے گذشتہ ڈیڑھ سال سے ایک بھی پرواز آپریٹ نہیں کی لیکن ماہانہ تنخواہ لیتے رہے ہیں۔

ذرائع کا مزید کہن اہے کہ چار پائلٹس میں ایک خاتون ہوا باز بھی شامل ہیں۔خاتون پائلٹ پی آئی اے سے چھٹی لے کر ترکی کی نجی ایئرلائن میں کام کررہی ہیں۔

خاتون پائلٹ نے اے 320 جہاز کی تربیت پی آئی اے کے خرچ پر کی،سیمولیٹر سرٹیفیکیٹ لے کر ترکی چلی گئیں۔

پی آئی حکام نے خاتون پائلٹ سے ڈیڑھ سال کی تنخواہ اور سیمولیٹر تربیت کے اخراجات واپس لینے کا بھی فیصلہ کیا ہے۔

ذرائع کا کہنا ہے کہ پائلٹس کی شیڈولنگ کرنے والوں کے خلاف بھی کارروائی کی جائے گی۔