مرکزی ڈپٹی سیکریٹری اطلاعات پیپلز پارٹی پلوشہ خان نے کہا ہے کہ عمران خان کی نالاٸقی کو نیب گردی کے ذریعے چھپایا نہیں جا سکتا۔

تفصیلات کے مطابق پاکستان پیپلز پارٹی کی مرکزی ڈپٹی سیکریٹری اطلاعات پلوشہ خان نے نیب کی جانب سے وزیراعلیٰ سندھ کی طلبی پرسخت ردعمل کا اظہار کرتے ہوئے کہا ہے کہ وزیراعلیٰ سندھ مراد علی شاہ کو پنڈی میں طلب کرنے سے سازش کی بو آرہی ہے

مرکزی ڈپٹی سیکریٹری اطلاعات پیپلز پارٹی نے کہا کہ وزیراعلی سندھ اپنے صوبے کے عوام کو کورونا کی وباءسے بچائے یا نیب گردی کا سامنا کرے جبکہ نیب پنجاب اور پختونخواہ میں اندھا، گونگا اور بہرا بنا ہوا ہے۔

 اپنے بیان میں پلوشہ خان نے یہ بھی کہا کہ حال ہی میں آٹا اور چینی کا بھران پیدا کرکے عوام کو لوٹنے والے نیب کی نظر سے اوجھل ہیں۔

 مرکزی ڈپٹی سیکریٹری اطلاعات پیپلز پارٹی پلوشہ خان نے مزید کہا کہ عمران خان کی نالائقی کو نیب گردی کے ذریعے چھپایا نہیں جا سکتا،ملک اس وقت حالت جنگ میں ہے عمران خان اور نیب انتشار کا سبب بن رہے ہیں۔

مراد علی شاہ کی کل نیب طلبی

یاد رہے اس سے قبل جعلی بینک اکاؤنٹس کیس میں وزیراعلیٰ سندھ سید مرادعلی شاہ کو کل نیب راولپنڈی میں طلب کر کیا گیا ۔

ذرائع کے مطابق سید مراد علی شاہ پر غیر قانونی طور پرسولر اسڑیٹس لائٹس کے ٹھیکے دینے کا الزام ہے، مراد علی شاہ کو ڈپٹی ڈائریکٹر نیب محمد کامران کی جانب سے طلب کیا گیا ہے۔

وزیراعلیٰ سندھ کی پیشی کے حوالے سے نیب نے ضلعی انتظامیہ اور پولیس سے سیکیورٹی بھی طلب کرلی۔