وزیر ریلوے شیخ رشید احمد کا گذشتہ  روز ہونے والے حادثے پر کہنا ہے کہ پھاٹک بند تھا حادثہ ڈرائیور کی غفلت سے پیش آیا۔

ریلوے ہیڈ کوارٹرز میں اہم میٹنگ کے بعد پریس کانفرنس کرتے ہوئے  وزیر ریلوے شیخ رشید احمد  کا کہنا تھا کہ ریلوے پھاٹک بند تھا بس ڈرائیورنے سائیڈ سے گاڑی نکالنے کی کوشش کی، جس سے قیمتی جانیں ضائع ہوئیں۔

وفاقی وزیر ریلوے  کا کہنا تھا کہ دس سال بعد ریلوے انقلاب میں داخل ہونے جا رہی ہے۔ رواں سال ریلوے کی ترقی کا سال ہے۔

شیخ رشید نے کہا کہ   1875 کلومیٹر کو ٹریک کی فزیبیلٹی سمیت کام مکمل ہو گیاہے۔ ایک ٹرین ایم ایل ون سے کم کرکے ایم ایل ٹو پر چلائیں گے۔

انہوں نے مزید کہا کہ  اس مہینے ایم ایل ون کی ایکنک اجلاس میں منظوری ہو جائے گی۔ ایم ایل ون میں اوپن میرٹ کے ذریعے ڈیڑھ لاکھ لوگوں کو روزگار ملے گا جس میں کوئی بلڈ کوٹہ نہیں ہوگا۔

وفاقی وزیر کا کہنا تھا کہ  صحافیوں کے رعایتی ٹکٹ اور بزرگوں کے لیے رعایت بھی بحال کردی ہیں۔

شیخ رشید نے کہا کہ  ماضی میں انجنوں اور ویگنوں میں کمیشن کھایا گیا۔ کرپشن کے تمام کیسز نیب میں دے رہا ہوں۔