کور کمانڈر کراچی لیفٹیننٹ جنرل ہمایوں عزیز نے سنٹرل پولیس آفس کا دورہ کیا اور اسٹاک ایکسچینج پر دہشت گرد حملہ ناکام بنانے پر قانون نافذ کرنے والے اداروں کو خراج تحسین پیش کیا۔۔

پاک فوج کےشعبہ تعلقات عامہ (آئی ایس پی آر) کے مطابق کور کمانڈر کراچی لیفٹیننٹ جنرل ہمایوں عزیز نے سنٹرل پولیس آفس کا دورہ کیا جہاں آئی جی پولیس سندھ مشتاق مہر نے کور کمانڈر کا استقبال کیا۔

ترجمان آئی ایس پی آر نے کہا کہ کور کمانڈر کراچی لیفٹیننٹ جنرل نے بہادر پولیس جوانوں کے لیئے آرمی چیف کا پیغام پہنچایا جبکہ یادگار شہداپر حاضری دی،فاتحہ اور پھول چڑھائے اور پولیس اہلکاروں میں تعریف اسناد بھی تقسیم کی۔

ترجمان آئی ایس پی آر نے مزید کہا کہ کور کمانڈر کراچی لیفٹیننٹ جنرل ہمایوں عزیز نے اسٹاک ایکسچینج پر دہشت گرد حملہ ناکام بنانے پر قانون نافذ کرنے والے اداروں کو خراج تحسین پیش کرتے ہوئے کہا کہ  پولیس، رینجرز، سیکیورٹی گارڈز نے بہادری سے دہشت گردوں کا حملہ ناکام بنایا۔

نیوی وار کالج پاک بحریہ کا قابل فخر ادارہ ہے، آرمی چیف

واضح رہے اس سے قبل آرمی چیف جنرل قمرجاوید باجوہ نے نیوی وار کالج لاہور کا دورہ کیا تھا ، نیوی وار کالج آمد پر کمانڈنٹ ریئر ایڈمرل محمد زبیر شفیق نے آرمی چیف کا استقبال کیا۔

نیوی وار کالج لاہور کے دورے میں آرمی چیف جنرل قمرجاوید باجوہ نے یادگار شہدا پر پھول چڑھائے،فاتحہ خوانی کی۔

ترجمان آئی ایس پی آر کا کہنا تھا کہ اپنے خطاب کے دوران آرمی چیف جنرل قمر جاوید باجوہ نے جیو اسٹریٹجک ماحول، سیکیورٹی چیلنجز اور پاکستان کے لیئے موجود مواقع پر بات کی۔