وفاقی وزیر اطلاعات  و نشریات سینیٹر شبلی فراز   کا کہنا ہے کہ بھارت مقبوضہ کشمیر  کے خطے پر گذشتہ 70  سالوں سے قابض ہے۔

تفصیلات کے مطابق  ’کشمیر محاصرے میں ہے‘کے عنوان سے سیمینار ہوا جس سے خطاب کرتے ہوئے وفاقی وزیر اطلاعات  و نشریات سینیٹر شبلی فراز  نے کہا کہ  بھارت گذشتہ کئی دہائیوں سے کشمیریوں کے حق خود ارادیت کو دبانے کی کوشش کررہا ہے۔

وفاقی وزیر اطلاعات  و نشریات نے کہا کہ  بھارت نے غیر آئینی اقدام کے بعد مقبوضہ کشمیر کی جغرافیائی  حیثیت کو تبدیل  کرنے کی کوشش کی ۔گذشتہ سال 5 اگست کےغیر قانونی  اقدام سے کشمیریوں  کو سنگین صورتحال کا سامنا ہے۔

شبلی فراز نے کہا کہ  اس اقدام سے بھارتی فوجیوں کو کشمیریوں کے گھروں میں داخل  ہونے کا حق دیا گیا۔5اگست کےاقدام سے غیر کشمیریوں کو شہریت کے حقوق دئیے گئے۔

انہوں نے کہا کہ  وزیراعظم عمران کی قیادت میں مسئلہ کشمیر کو دنیا کے تمام فورمز پر اٹھائیں گے۔

سیمینار سے خطاب کرتے ہوئے  معاون خصوصی قومی سلامتی ڈاکٹر معید یوسف  نے کہا کہ دنیا بھر کے عالمی ذرائع ابلاغ نے بھارت کی حکومت کو فاشسٹ قراردیا ہے۔

انہوں نے مزید کہا کہ موجود ہ حکومت کی مؤثر سفارتکاری سے مقبوضہ کشمیر کی صورتحال دنیا بھر میں اجاگر ہوئی ہے۔