صوبائی وزیر بلدیات ناصر حسین شاہ  نے کہا ہے کہ کراچی میں بارشوں کے نئے اسپیل سے نمٹنے کے لئے تیاریاں مکمل ہیں، تمام میونسپل کمشنرز سے مستقل رابطے میں ہوں۔

صوبائی وزیر بلدیات سید ناصر حسین شاہ نے سیکریٹری بلدیات اور متعلقہ بلدیاتی افسران کو ہدایت کی کہ وہ اپنے اپنے اضلاع میں بارشوں کے نئے اسپیل کے لئے ممکنہ طور پر تیاریاں مکمل کرلیں مرکزی اور ذیلی نالوں پر سالڈ ویسٹ کا عملہ اور دیگر متعلقہ اسٹاف کی مقرری کو یقینی بنائیں اہم چوک پوائنٹس پر ڈی واٹرنگ مشینوں کی تنصیب بھی کر دی جائے تاکہ بارشوں کے دوران فورا پانی کا نکاس ممکن بنایا جا سکے۔

اس موقع پر میونسپل کمشنر شرقی وسیم سومرو نے وزیر بلدیات سندھ کو بتایا کہ ضلع شرقی کی حدود میں واقع تمام نالوں کی صفائی پر خصوصی توجہ دی جارہی ہے اور تمام بلدیاتی عملہ بھی ہنگامی حالات پر قابو پانے کے لئے مکمل طور پر تیار ہے۔

ناصر حسین شاہ نے خصوصی گفتگو میں بتایا کہ تمام اضلاع میں پہلے سے ہی ایمرجنسی کا نفاذ ہے لہذا کسی بھی طرح کی غیر یقینی صورت حال پر قابو پانے کے لئے تمام میونسپل و ڈپٹی کمشنرز کو احکامات جاری کردئیے ہیں۔

وزیر بلدیات کے مطابق بارشوں کا متوقع اسپیل آج سے متوقع ہے، تمام اہم چوکنگ پوائنٹس، انڈر پاسز اور نشیبی علاقوں کے حوالے سے خصوصی اقدامات بروئے کا لائے گئے ہیں، ایمرجنسی مانیٹرنگ یونٹس مکمل طور پر فعال ہیں، حساس مقامات پر ڈی واٹرنگ مشینوں کی تنصیب کردی گئی ہے۔

ناصر حسین شاہ نے عوام سے اپیل کی کہ بارشوں کے دوران ٹریفک اہلکاروں سے تعاون کریں اور بلا ضرورت گھر سے نکلنے سے اجتناب کریں۔

صوبائی وزیر بلدیات و اطلاعات جنگلات، مذہبی امور سید ناصر حسین شاہ نے تمام بلدیاتی افسران کو پابند کیا ہے کہ وہ حالیہ بارشوں کی وجہ سے شہر کے تمام برساتی نالوں کی صفائی کے عمل کو لگاتار جاری و ساری رکھیں تمام سڑکوں اور شاہراہوں پر صفائی کے عملے کو یقینی بنائیں بناتے ہوئے کسی بھی صورت حال پر قابو پانے کے لیے ہر وقت تیار رہیں یہ ہدایات انہوں نے شہر کراچی کے تمام بلدیاتی افسران سے حالیہ بارشوں کے بعد شہر کی صورتحال کا ذاتی طور پر جائزہ لینے کے دوران دیں۔