وزیر توانائی سندھ امتیاز احمد شیخ نے کہا ہے کہ وفاقی وزراء نے کے الیکٹرک کو بچانے کی ناکام کوشش کی ہے۔

تفصیلات کے مطابق وزیر توانائی سندھ امتیاز احمد شیخ کی جانب سے وفاقی وزیر اسد عمر کے بیان پر ردعمل ظاہر کیا گیا ہے۔

 انہوں نے کہا ہے کہ کراچی میں لوڈ شیڈنگ سے متعلق اسد عمر کےاعلان سے کوئی فرق نہیں پڑے گا کیونکہ وفاقی وزراء کی جانب سے لوڈشیڈنگ کے خاتمے کے اعلانات گزشتہ کئی روز سے جاری ہیں۔

وزیر توانائی کی جانب سے امید ظاہر کی گئی ہے کہ اسد عمر کی تقریر ماضی میں اسٹیل ملز کے مزدوروں سے کئے گئے وعدوں کے مطابق نہیں ہوگی۔

امتیاز شیخ نے واضح طور پر کہا ہے کہ وفاق نے 100 ملین کیوبک فیٹ گیس بڑھا کر کراچی کے عوام پر احسان نہیں کیا ہے کیونکہ صرف 190 کیوبک فیٹ گیس کے الیکٹرک کو مل رہی تھی۔

انہوں نے بتایا کہ کے الیکٹرک کو گیس میں اضافے کے بعد صنعتی ایریاز اور سی این جی اسٹیشنز کو گیس کی فراہمی بند کر دی گئی ہے ، صنعتوں اورسی این جی اسٹیشنز کی بندش سے ہزاروں افراد کے بےروزگار ہو جانے کا خدشہ ہے۔

ان کا مزید کہنا تھا کہ وفاقی وزراء اپنی نااہلی اور ناکامی کا اعتراف کرنے کے بجائے عوام کو مزید معاشی مشکلات میں مبتلا کر رہے ہیں۔

 انہوں نے کہا کہ کے الیکٹرک کو فرنس آئل نہ ملنے کی وجہ سے لوڈشیڈنگ میں اضافہ ہوا ہے۔

امتیاز شیخ کا کہنا تھا کہ پی ٹی آئی کا احتجاج وزیراعظم اور ان کی کابینہ کی غلط پالیسیوں کے خلاف تھا اور اب پی ٹی آئی کے اراکین اسمبلی احتجاج جاری رکھیں یا ختم کریں عوام کو کوئی فرق نہیں پڑا ہے کیونکہ کراچی میں 16 گھنٹے اعلانیہ اور غیر اعلانیہ لوڈشیڈنگ کی جارہی ہے۔