وزیر خارجہ شاہ محمود قریشی نے کہا ہے کہ پاکستان، افغانستان سمیت خطے میں امن و استحکام کیلئے اپنی مخلصانہ اور مصالحانہ کاوشیں جاری رکھے گا۔

وزیر خارجہ مخدوم شاہ محمود قریشی کا یورپی یونین کے خارجہ امور کے سربراہ، جوزف بوریل سے ٹیلیفونک رابطہ ہوا ہے۔

دونوں وزرائے خارجہ کے مابین افغانستان کی صورتحال پر بھی تبادلہ خیال ہوا ہے جبکہ دونوں وزرائے خارجہ نے افغانستان کے حوالے سے مشترکہ اسٹیٹمنٹ سامنے لانے پر اتفاق بھی کیا ہے۔

یورپی یونین کے امور خارجہ کے سربراہ نے کراچی میں اسٹاک ایکسچینج پر ہونیوالے دہشت گردی کے حملے اور قیمتی جانوں کے نقصان پر وزیر خارجہ سے اظہار تعزیت کیا جبکہ وزیر خارجہ نے اپنے یورپی ہم منصب کو پاکستان میں بدامنی پھیلانے کیلئے  شرپسند عناصر کو حاصل بھارتی سرپرستی سے بھی آگاہ کیا ہے۔

وزیر خارجہ مخدوم شاہ محمود قریشی نے یورپی یونین کے امور خارجہ کے سربراہ کو حالات معمول پر آنے کے بعد دورہ پاکستان کی دعوت دی جبکہ یورپی یونین کے سربراہ خارجہ امور، جوزف بوريل نے وزیر خارجہ کو دورہ برسلز کی دعوت بھی دی ہے۔

دونوں وزرائے خارجہ کے مابین دو طرفہ تعلقات، کورونا وبا کی صورتحال سمیت باہمی دلچسپی کے امور پر بھی تبادلہ خیال کیا گیا ہے۔

 وزیر خارجہ نے اپنے یورپی ہم منصب کو، بھارت کی جانب سے مقبوضہ جموں و کشمیر میں جاری انسانی حقوق کی سنگین خلاف ورزیوں سے آگاہ کیا گیا اور بتایا کہ بھارت، اقوام متحدہ اور عالمی قوانین سے روگردانی کرتے ہوئے مقبوضہ جموں و کشمیر میں آبادیاتی تناسب کو بدلنا چاہتا ہے۔

ان کا کہنا تھا کہ بھارت سرکار کی طرف سے پچیس ہزار غیر کشمیریوں کو خلاف قانون ڈومیسائل کا اجراء قابل مذمت ہے جسے تمام کشمیری مسترد کر چکے ہیں۔