وزیر خارجہ شاہ محمود قریشی نے کہا ہے کہ اگر مسلم لیگ ن سمجھتی ہے کہ مریم نواز کی نیب پیشی ہر ہونے والے واقعات سے فائدہ ہوگا تو غلط فہمی ہے۔

تفصیلات کے مطابق شاہ محمود قریشی نے قومی اسمبلی میں خواجہ آصف کی تقریر پر ردعمل دیتے ہوئے کہا کہ مریم نواز کی نیب پیشی کے دوران ہونے والی ہنگامہ آرائی کی تحقیقات ہونی چاہیے کہ یہ واقعہ کیوں پیش آیا۔

شاہ محمود قریشی نے کہا کہ پنجاب حکومت کو ایسے واقعے سے ظاہری طورپرکوئی فائدہ نہیں دکھائی دیتا جوحقائق ہیں ان کی روشنی میں آئندہ کیلئے طے کر لیا جائےکہ دوبارہ ایسانہ ہو۔

وزیر خارجہ شاہ محمود قریشی نے مزید کہا کہ ن لیگ قیادت کی جانب سےکارکنان کو بھی صبرکی تلقین کرنی چاہیے احمقانہ حرکت کوئی بھی کرسکتاہے جبکہ کوئی بھی ذی شعورایسی حرکت نہیں کرے گا۔

عمران خان کا اب ایک ہی مقصد ہے کہ اپوزیشن کو دبائو ، مریم نواز

یاد رہے کہ آج مریم نواز کی پیشی کے موقع پر لیگی کارکنوں کی جانب سے پولیس پر پتھراؤ کیا گیا تو صورتحال کشیدہ ہو گئی۔ نیب دفتر کی حفاظت پر مامور پولیس اہلکاروں نے جوابی کارروائی کرتے ہوئے لیگی کارکنوں کو منتشر کرنے کے لیے آنسو گیس کے شیل پھینکے اور لاٹھی چارج بھی کیا۔

پولیس کے لاٹھی چارج کے نتیجے میں لیگی کارکن منتشر ہوئے تو پولیس نے ہتھے لگنے والے کارکنوں کو پکڑ کر گرفتاریاں عمل میں لانا شروع کر دیں۔

لیگی رہنما مریم نواز نے کارکنوں سے غیر رسمی گفتگو کرتے ہوئے کہا کہ وہ ڈرنے والی نہیں، وہ اور ان کے والد اپنے موقف پر قائم ہیں، میرے اوپر جعلی اراضی کیس بنایا گیا۔

لیگی رہنما قافلے کی صورت میں جاتی امرا رائیونڈ سے نیب آفس پہنچیں۔