اپوزیشن لیڈر شہبازشریف کی جانب سے تنقیدی لہجے میں کہا گیا ہے کہ حکومت نے سیاسی پوائنٹ اسکورنگ کرنی ہے تو کرلیں کیونکہ حکومت نے کشمیر پر ناٹک بہت رچائے مگر عملاً کچھ نہیں کیا ہے۔

تفصیلات کے مطابق پارلیمانی اجلاس میں اپوزیشن لیڈرشہباز شریف نے کہا ہے کہ کشمیر پر حکومت کی جانب سے تقریر تحریر اور ٹیلی فون کے علاوہ کچھ نہیں کیا گیا ہے اور آج بھی کشمیر پر خاموشی ہے جس وجہ سے کشمیر ایشو پر مایوسی پھیل رہی ہے۔

انہوں نے کہا ہے کہ کشمیر پر بات نہ کرنے دینے کا مطلب کشمیر کاز نقصان پہنچانا ہے جبکہ ایک طرف عمران خان ارتغرل دیکھنے کا کہتے ہیں دوسری طرف مودی کی کال کا انتظار کرتے ہیں۔

شہبازشریف نے شکوہ کرتے ہوئے کہا ہے کہ وزیر خارجہ کو اتنی توفیق نہیں ہوئی کہ مجھے اور بلاول کو کال کرکے کشمیر کانفرنس میں بلا لیتے جبکہ ہمیں ان کے ٹیلی فون کی ضرورت نہیں مگر کشمیر کے لئے کرلیتے۔

انہوں نے کہا ہے کہ ہم اس بات کے حق میں نہیں ایٹمی اسلحہ لیکر بھارت پر چڑھ دوڑیں اور اس ضمن میں آج ہمیں اور اسلامی ممالک کو کشمیریوں کا ہاتھ جھٹکنا نہیں پکڑنا ہے۔