پاکستان مسلم لیگ ن کی ترجمان مریم اورنگزیب نے وزیراعظم کو تنقید کا نشانہ بناتے ہوئے کہا ہے کہ عمران صاحب میڈیا پر ڈھول بجانے سے دو سال کی منفی کارکردگی مثبت نہیں ہوجائے گی۔

تفصیلات کے مطابق پاکستان مسلم لیگ (ن) کی ترجمان مریم اورنگزیب کی جانب سے وفاقی وزرا کی پریس کانفرنس پر ردعمل ظاہر کیا گیا ہے۔

 مریم اورنگزیب کا کہنا تھا کہ موجودہ حکومت میں دو سال میں ہر شعبہ کی تباہی ہی ہوئی ہے۔

انہوں نے سوالات کرتے ہوئے کہا کہ دوسال میں 5.8 فیصد ترقی کی شرح 0.4 فیصد کیوں ہوئی؟ دو سال میں 13000 ارب قرض لے کر بھی ایک نئی اینٹ نہیں لگائی ؟ دو سال میں 80 لاکھ لوگ غربت کی لکیر سے نیچے کیوں چلے گئے؟

ان کا کہنا تھا کہ دو سال میں روپے کی قدر میں 45 فیصد ریکارڈ کمی کے باوجود برآمدات مسلم لیگ (ن) کے آخری سال سے کم رہیں ؟ دو سال میں 20 لاکھ لوگ بےروزگار ہوگئے۔

ترجمان نے مزید سوالات کرتے ہوئے کہا کہ دو سال میں چینی 52 سے 110 روپے کلو، آٹا 33 سے 78 روپے کلو ہوگیا؟ دو سال میں بجلی کی قیمت میں 50 فیصد سے زائد اور گیس کی قیمت میں300 فیصد اضافہ ہوا؟