وزیراعلیٰ سندھ سید مراد علی شاہ نے کہا ہے کہ کراچی میں امن و امان کی بحالی میں سندھ پولیس کا اہم اور فعال کردار رہا ہے۔

تفصیلات کے مطابق وزیراعلیٰ سندھ سید مراد علی شاہ نے  پولیس کے یوم شہداء کے موقع  پر اپنے  پیغام میں کہا کہ صوبہ سندھ میں  قائم امن و امان میں سندھ پولیس کے  ان شہداء کا  اہم کردار ہے اور آج تمام صوبوں بشمول گلگت بلتستان کی پولیس کی قربانیاں اور شہداء کے خاندانوں سے یکجہتی کا دن ہے۔

وزیراعلیٰ سندھ سید مراد علی شاہ نے کہا کہ عوام کے تحفظ اور امن و امان کیلئے پولیس نے بڑی قربانیاں دی ہیں اور میں پولیس شہداء کے اہل خانہ کو سلام پیش کرتا ہوں جن کے بہادر جوان بیٹوں نے عوام کی حفاظت کیلئے اپنی جانیں قربان کیں۔

سید مراد علی شاہ نے یہ بھی کہا کہ سندھ حکومت نے  پولیس کے شہداء کے خاندانوں کو کبھی اکیلا نہیں چھوڑا۔

آئی ایس پی آر کا 5 اگست کی مناسبت سے پرومو جاری

وزیراعلیٰ سندھ سید مراد علی شاہ نے مزید کہا کہ سندھ پولیس کے 2100 جوانوں نے اپنی جان کا نذرانہ پیش کرکے صوبے میں امن بحال کیا جبکہ کورونا وائرس کی ایمرجنسی میں سندھ پولیس کے 16 جوانوں نے جان کا نذرانہ پیش کرکے عوام کے تحفظ کو یقینی بنایا۔

یاد رہے کہ اس سے قبل وزیراعلیٰ سندھ سید مراد علی شاہ  اپنے میرپورخاص اور حیدرآباد کے دورے سے واپسی پر کراچی ائیر پورٹ کے نزدیک یادگار شہداء پولیس پر گئے اور وہاں پر اُنھوں نے شہداء کے لیے فاتحہ خوانی کی جبکہ شہداء کی یاد میں دیئے بھی جلائے تھے۔

واضح رہے کہ 5 اگست کو کشمیر پر بھارتی قبضے کو ایک سال مکمل ہونے پر دنیا بھر میں یوم استحصال منایا جائے گا۔