معاون خصوصی برائے سیاسی روابط ڈاکٹر شہباز گل موجودہ سمیت کسی بھی حکومت نے کشمیریوں کے مفادات کا سودا کیا ہو اس پر خدا کی لعنت ہو اور دوسری صورت میں ایسا الزام لگانے والوں پر بھی۔

تفصیلات کے مطابق اپنے ایک بیان میں معاون خصوصی برائے سیاسی روابط ڈاکٹر شہباز گل کا کہنا تھا کہ کشمیر ایک منٹ کی خاموشی سے آزاد نہیں ہوگا۔

انہوں نے کہا ہے کہ عمران خان واحد لیڈر ہے جنہوں نے کشمیر کے مسئلے کو انٹرنیشنلائز کیا ہے اور کشمیر اور اسلام کا مقدمہ عمران خان نے انٹرنیشنل فورمز پر کیسے لڑا قوم بخوبی واقف ہے۔

ان کا کہنا تھا کہ انڈیا نے لائن آف کنٹرول کی خلاف ورزی کی تو اُنہیں منہ توڑ جواب دیا گیا اور دو طیارے گرا کر انڈیا کو بتا دیا گیا کہ اب پاکستان میں عمران خان کی حکومت ہے۔

دوسری جانب مولانا فضل الرحمان کو مخاطب کرتے ہوئے شہباز گل کا کہنا تھا کہ کشمیر کے نام پر رینٹ اے مولانا سرکاری مراعات لیتے رہے ہیں، آپ نے کروڑوں روپے کے فنڈز لے کر کشمیر کے نام پر چند اجلاس اور بیانات دیئے، اس کے بعد تو آپ کو تو شرمندگی سے کشمیر کا لفظ بھی اپنے منہ سے نہیں نکالنا چاہئے۔

انہوں نے کہا کہ کشمیر کا تو نہیں مولانا کا سودا ضرور ہو جائے اگر انہیں کشمیر کمیٹی کا چیئرمین لگا دیا جائے کیونکہ جنہوں نے کشمیر کمیٹی دے کر آپکا سودا کیا انہوں نے حریت لیڈروں سے ملنا بھی پسند نہیں کیا۔