سربراہ پاک فضائیہ ایئر چیف مارشل مجاہد انور خان کا کہنا ہے کہ  پاک فضائیہ بری اور بحری افواج کے شانہ بشانہ ہمہ وقت تیار ہے۔

ترجمان پاک فضائیہ کے مطابق  سربراہ پاک فضائیہ ایئر چیف  مارشل مجاہد انور خان نے آج ایک آپریشنل ائیر بیس کا دورہ کیا۔

ایئر چیف  نے جے ایف 17 بی  (ڈوئل سیٹ) طیارے میں ایک آپریشنل ٹریننگ مشن میں حصہ لیا۔

 ایف سولہ طیارہ اڑانے کا وسیع تجربہ رکھنے  والے ایئر چیف نے ملک میں تیار کیے گئے اس ڈوئل سیٹ لڑاکا طیارے کی آپریشنل صلاحیتوں کا جائزہ لیا۔

ایئر چیف  نے کہا کہ پاک فضائیہ میں جے ایف 17 ڈوئل سیٹ  اور بلاک تھری کی شمولیت پاک فضائیہ کی جدیدیت کو برقرار رکھنے میں معاون ثابت ہو گی۔

سربراہ پاک فضائیہ  نے کہا کہ پاک فضائیہ کا ہر فرد ہمارے بہادر سپوتوں کی وراثت کا امین ہے جس کا اظہار گذشتہ سال آپریشن سوئفٹ ریٹورٹ کے دوران کیا گیا۔

ائیر چیف نے کہا کہ پاک فضائیہ دشمن کی جانب سے اسلحے کے ذخائر اکٹھا کرنے سے کبھی مرعوب نہیں ہو گی۔

انہوں نے کہا کہ پاک فضائیہ بری اور بحری افواج کے شانہ بشانہ مادر وطن کی خودمختاری کو درپیش کسی بھی خطرے سے نمٹنے کے لئے ہمہ وقت تیار ہے۔