سندھ حکومت نے ہیلتھ اینڈ باڈی فٹنس کلب کھولنے کی اجازت دے دی ہے۔

تفصیلات کے مطابق سندھ حکومت نے کورونا وائرس کے پیش نظر کراچی میں تقریباً پانچ ماہ بند رہنے کے بعد ہیلتھ کلب اور جم کھلنے کا اعلان کردیا ہے۔

سندھ حکومت کی جانب سے جاری کردہ ایس او پیز کے مطابق عملے  اور ممبر دونوں کے لئے  سرجیکل ماسک پہننا اور سماجی فاصلہ برقرار رکھنا لازم ہے۔

جم ٹرینر کا کہنا ہے کہ سندھ حکومت کے اس اقدام کو سراہتے ہیں اور اب جم کر ٹریننگ کررہے ہیں۔

ایس او پیز کے مطابق جم میں صابن سے  ہاتھ دھونے یا سینیٹائز کرنے کی سہولت مہیا کرنا لازم ہے، جم کے اندر کھانسنے اور چھینکنے کے آداب اور احتیاطی تدابیر اپنائی جائیں۔

ہیلتھ کلب اور جم کھولنے کا اعلان

دوسری جانب سندھ حکومت نے کاروباری سرگرمیوں کےنئے اوقات کار کا اعلان کیا گیا ہے جس کے تحت ہفتے کے6 روز تمام کاروباری سرگرمیاں جاری رہیں گی۔

نوٹیفکیشن  میں کہا گیا ہے کہ سندھ میں کاروباری اوقات کار صبح 6بجے سے رات 8بجے تک ہونگے جبکہ ہفتے کےروز سندھ میں کاروباری سرگرمیاں رات 9بجےتک ہوسکیں گی۔

 نوٹیفکیشن میں مزید کہا گیا ہے کہ سینما تھیٹرز ، ہوٹلز ، ریسٹورینٹس ، بیوٹی پارلرز، جم ، پارک پر عائد پابندیاں ختم کر دی گئی ہیں جبکہ شادی ہالز ، ایکسپو ہال اور اسکولز 15ستمبر تک بند رہیں گے۔