کراچی میں موسلادھار بارش کے بعد فوج اور رینجرز کی 70 ٹیمیں امدادی کاموں میں مصروف ہیں۔

پاک فوج کےشعبہ تعلقات عامہ (آئی ایس پی آر) کے مطابق کراچی میں شدید بارشیں، میٹروپولیٹن شہر بری طرح متاثر ہوا جبکہ کراچی کے ساتھ کیرتھر میں بھی بارش سے لٹھ اور تھاڈو ڈیم اوور فلو ہو گئے۔

ترجمان آئی ایس پی آر نے کہا کہ لٹھ ڈیم اوور فلو ہونے سے ناردرن بائی پاس متاثر، ملیر ندی میں بھی شدید سیلاب آ گیا جبکہ فوج اور رینجرز کے دستے متاثرہ افراد کو مدد فراہم کر رہے ہیں۔

ترجمان آئی ایس پی آر نے یہ بھی کہا کہ ایم نائن کو سیلاب سے بچانے کے لیئے آرمی انجینرز نے فوری طور پر دو سو میٹر لمبا اور چار فٹ اونچا بند بنایا جبکہ قائد آباد کے عوام کو آرمی انجینرز کی کشتیوں کے ذریعے محفوظ مقامات تک پہنچایا جا رہا ہے۔

ترجمان آئی ایس پی آر کا کہنا ہے کہ ڈی ایچ اے، گزری، کیماڑی سیلاب سے بری طرح متاثرجبکہ نارتھ کراچی، ناظم آباد، صدر کے علاقے بھی سیلاب سے شدید متاثر ہیں۔

ترجمان آئی ایس پی آر کا یہ بھی کہنا ہے کہ لانڈھی، ایئرپورٹ، فیصل بیس، یونیورسٹی روڈ، جناح ٹرمینل کے علاقے بھی پانی میں ڈوبے ہیں جبکہ سعدی ٹائون، قائد آباد، یوسف گوٹھ، پی اے ایف مسرور، گلشن جوہر کے علاقے بھی شدید متاثر ہیں۔

مزید پڑھیں

کراچی ، سب سے زیادہ بارش گلشنِ حدید میں ریکارڈ

محکمہ موسمیات نے شہر قائد میں 24 گھنٹوں کے دوران ہونے والی...

ترجمان آئی ایس پی آر کا مزید کہنا ہے کہ مہران نالے کے سیلابی ریلے سے کے الیکٹرک گرڈ اسٹیشن کو بچانے کے لیئے تین آرمی انجینئرز ٹیمیں تعینات کی گئی ہے جبکہ سیلاب میں پھنسے افراد کو کھانا بھی فراہم کیا جا رہا ہے اور شدید سیلابی صورتحال میں فوج اور رینجرز کی 70 ٹیمیں امدادی کاموں میں مصروف ہیں۔

واضح رہے کہ صوبہ سندھ میں مون سون بارشوں نے تباہی مچادی ہے جب کہ کراچی میں مسلسل بارش کے باعث کئی نشیبی علاقے زیر آب آگئے ہیں۔