آئی جی سندھ مشتاق احمد مہر کا کہنا ہے کہ  محرم الحرام کے موقع پر کورونا ایس او پیز پر عمل درآمد کو یقینی بنایا جائے۔

تفصیلات کے  مطابق  آئی جی سندھ مشتاق احمد مہر کی زیرصدارت محرم الحرام کےحوالے سےحیدرآباد، میرپور خاص، شہید بینظیرآباد،سکھر،لاڑکانہ رینج کے ڈی آئی جیز پر مشتمل اعلیٰ سطحی  ویڈیو لنک اجلاس ہوا۔

اجلاس میں اہل تشیع علماء نے بھی بذریعہ ویڈیو لنک شرکت کی۔

اس موقع پر آئی جی سندھ نے کہا کہ  محرم الحرام کے موقع پر کورونا ایس او پیز پر عمل درآمد کو یقینی بنایا جائے۔

مشتاق احمد مہر نے کہا کہ محرم کے حوالے سے ممکنہ حساس علاقوں میں اسپیشل برانچ اور علاقہ تھانہ پولیس تمام تر سیکیورٹی امور واقدامات کو غیرمعمولی بنایا جائے۔

انہوں نے ہدایت کی کہ محرم الحرام کی مناسبت سے منعقدہ جملہ مجالس، برآمد ہونے والے چھوٹے بڑے جلوسوں،مجالس کے مقامات، اور جلوسوں کے روٹس پر سیکیورٹی کے مجموعی اقدامات کو انتہائی مربوط اور ٹھوس بنایا جائے۔

آئی جی سندھ  نے کہا کہ   سیکیورٹی کے ساتھ ساتھ محرم کے مرکزی جلوسوں،مجالس کے شرکاء میں ماسک،ہینڈ گلوز/دستانے، سینیٹائزر کے استعمال پر بھی خصوصی توجہ دی جائے اور سماجی فاصلہ (سوشل ڈسٹینس) کو بھی ملحوظ خاطر رکھا جائے۔