نواز شریف کے ناقابل ضمانت وارنٹ گرفتاری جاری کرنے کے معاملے پر اسلام آباد ہائیکورٹ کی جانب سے سماعت کا تحریری حکمنامہ جاری کردیا گیا ہے۔

اس ضمن میں تحریری فیصلہ اسلام آباد ہائیکورٹ کے ڈویژنل بینچ نے جاری کیا گیا ہے۔

تحریری حکم نامے کے مطابق نواز شریف کی حاضری سے استثنیٰ اور نمائندے کے ذریعے ٹرائل جاری رکھنے کی درخواست مسترد کی گئی ہے اور نواز شریف کے ناقابل ضمانت وارنٹ گرفتاری جاری کیے گئے ہیں۔

حکم نامے میں کہا گیا ہے کہ 22 ستمبر کو نواز شریف کو گرفتار کر کے عدالت میں پیش کیا جائے۔

حکم نامے میں مزید کہا گیا ہے کہ احتساب عدالت کی جانب سے نواز شریف کو اشتہاری قرار دیا گیا ہے اور عدالت میں عدم حاضری کے باعث نواز شریف کے وارنٹ گرفتاری جاری کیے گئے ہیں۔

حکم نامے میں کہا گیا ہے کہ وفاقی حکومت برطانیہ میں پاکستانی ہائی کمیشن کے ذریعے عدالتی حکم پر عملدرآمد کرائے۔