پاکستان نے  بھارت اور امریکہ  کے 17 ویں انسدادِ دہشت گردی مشترکہ ورکنگ گروپ کے اعلامیے پر شدید ردعمل دیا ہے۔

ترجمان وزارت خارجہ کی جانب سے جاری بیان میں کہا گیا ہے کہ پاکستان ،بھارت اور  امریکہ مشترکہ ورکنگ گروپ برائے انسداد دہشت گردی کے 17 ویں اجلاس کے مشترکہ اعلامیے میں پاکستان کے بلاجواز حوالے کو سختی سے مسترد کرتا ہے ۔

ترجمان وزارت خارجہ کا کہنا ہے کہ  ہم نے اس حوالے سے اپنے تحفظات امریکی متعلقہ حکام تک پہنچا دیے ہیں ۔

انہوں نے مزید کہا کہ ضرورت اس بات کی ہے کہ تمام شریک ممالک جنوبی ایشیائی خطے کے امن و امان سے جڑے مسائل کا تذکرہ  زمینی حقائق کو پیش نظر رکھتے ہوئے کریں اور اور یک طرفہ اور حقائق کے منافی آراء سے احتراز کریں ۔

ترجمان وزارت خارجہ کا کہنا ہے کہ  بین الاقوامی برادری اس حقیقت سے اچھی طرح باخبر ہے کہ پاکستان ہندوستان کی ایما اور معاونت پر مبنی سرحد پار سے ہونے والی دہشت گردی کا شکار رہا ہے۔

انہوں نے کہا کہ عالمی برادری پاکستان کی دہشت گردی کے خلاف کی جانے والی کاوشوں، قربانیوں اور ان کے نتیجے میں حاصل ہونے والی کامیابیوں کو بھی تسلیم کرتی ہے ۔

ترجمان وزارت خارجہ کا کہنا تھا کہ  پاکستان اس امر کا بارہا اظہار کر چکا ہے کہ آر ایس ایس کے ایجنڈے پر گامزن بی جے پی سرکار کا غیر ذمہ دارانہ رویہ، اقلیتوں کے ساتھ ناروا سلوک،مقبوضہ کشمیر میں ریاستی دہشت گردی، اور پاکستان اور خطے کے دیگر ممالک کے خلاف بھارت کا جارحانہ سلوک ،پورے جنوبی ایشیائی خطے کے امن کو شدید خطرات سے دوچار کر رہا ہے ۔

انہوں نے کہا کہ   عالمی برادری کو بھارت پر زور دینا چاہیے کہ وہ خطے کے امن و استحکام کے منافی روش اپنانے سے باز رہے ۔