وزیر اعظم عمران خان کی معاون خصوصی ثانیہ نشتر کا کہنا ہے کہ احساس کیش پروگرام سے  1 کروڑ 16 لاکھ افراد استفادہ کر چکے ہیں۔

تفصیلات کے مطابق  مشیر خزانہ عبدالحفیظ شیخ کی زیر صدارت اجلاس ہوا۔اجلاس میں وزیر اعظم کی معاون خصوصی برائے تخفیف غربت ثانیہ نشتر نے بھی شرکت کی۔

معاون خصوصی نے احساس کیش پروگرام کے بارے میں اجلاس کو بریفنگ دی۔

ثانیہ نشتر نے بریفنگ میں بتایا کہ  احساس کیش پروگرام کے تحت 1 کروڑ سے زائد افراد میں 175 ارب روپے تقسیم کیے گئے ہیں۔

انہوں نے کہا کہ کفالت پروگرام سے استفادہ کرنے والے افراد کی تعداد 46 لاکھ ہے ۔وزیر اعظم کی ہدایت پر مزید ضرورت مند افراد تک رقم پہنچائی جائے گی۔

معاون خصوصی نے کہا کہ کورونا وباء کے دوران ایک مرتبہ کیش پروگرام سے  1 کروڑ 16 لاکھ افراد استفادہ کر چکے ہیں۔احساس پروگرام کی دوسری قسط کی ادائیگی کے لیے فہرست ترتیب دی جارہی ہے۔

مشیر خزانہ عبدالحفیظ شیخ نے تخفیف غربت ڈویژن کی کارکردگی کو سراہتے ہوئے کہا کہ تخفیف غربت ڈویژن نے ملک ضرورت مند اور غریب طبقے کی غیر یقینی صورتحال میں مدد کی ہے۔

انہوں نے کہا کہ وزارت خزانہ اس کام میں ہر ممکن مدد فراہم کرے گی۔تخفیف غربت ڈویژن خزانہ ڈویژن کو احساس پروگرام کے پہلے مرحلے کے اخراجات اور شفافیت سے آگاہ کرے۔