وزیراعلیٰ پنجاب سردار عثمان بزدار نے کہا ہے کہ اراکین اسمبلی کے جائز مسائل فوری حل کئے جائیں گے۔

تفصیلات کے مطابق وزیراعلیٰ پنجاب سردار عثمان بزدار سے مختلف اضلاع کے  اراکین صوبائی اسمبلی کی ملاقات ہوئی جس میں منتخب نمائندوں نے وزیراعلیٰ عثمان بزدار کو اپنے حلقوں او رعلاقے کے مسائل سے آگاہ کیا گیا۔

اس موقع پر وزیراعلیٰ پنجاب عثمان بزدار نے کہا کہ اراکین اسمبلی کو مسائل ترجیحی بنیادوں پرحل کرنے کی یقین دہانی کراتے ہوئے کہا کہ میرے دروازے سب کے لئے کھلے ہیں۔

وزیراعلیٰ پنجاب نے کہا کہ ماضی کے حکمرانوں نے ون مین شو کے ذریعے تمام اختیارات اپنی ذات تک محدود کئے رکھے جبکہ اراکین پنجاب اسمبلی میرے دست و باؤز ہیں ،انہیں عزت و احترام دیں گے۔

عثمان بزدار نے یہ بھی کہا کہ شور مچانے والے عناصر کو پہلے اپنے گریبان میں جھانکیں جبکہ لوٹ مار کا دور کبھی واپس نہیں آئے گا-

وزیراعلیٰ پنجاب سردار عثمان بزدار نے مزید کہا کہ وزیراعظم عمران خان کی قیادت میں نئے پاکستان میں کرپشن اور کرپٹ عناصر کی کوئی گنجائش نہیں جبکہ تنقید کی پرواہ کئے بغیر عوامی خدمت کے  سفر کومزید تیزی سے آگے بڑھائیں گے۔

اراکین اسمبلی نے وزیراعلیٰ پنجاب سردار عثمان بزدار سے گفتگو کرتے ہوئے کہا کہ آپ کی قیادت اور پالیسیوں پر پورا اعتماد ہے۔

اراکین اسمبلی نے مزید کہا کہ ہم آپ کے ساتھ ہیں جبکہ عوام کی خدمت کے سفر میں آپ کے ساتھ کھڑے ہیں۔

وزیراعلیٰ پنجاب ٰعثمان بزدار سے ملاقات کرنے والوں میں چودھری اشرف علی انصاری، محمد غیاث الدین،  محمد فیصل خان  نیازی اور میاں جلیل احمد  شرقپوری ، چودھری محمد یونس انصاری بھی شریک ہوئے۔