سانحہ بلدیہ فیکٹری کیس میں ملزمان  زبیر چریا اور رحمان بھولا کو سزائے موت سنادی گئی۔

تفصیلات کے مطابق انسداد  دہشت گردی عدالت نے  8سال بعد سانحہ بلدیہ کیس  کا فیصلہ  سنادیا۔

انسداد  دہشت گردی عدالت نے رحمان عرف بھولا  اورزبیر عرف چریا پر فیکٹری کو آگ لگانے کا جرم ثابت ہونے پر سزائے موت سنا دی۔

عدالت نے 4مجرمان کو سہولت کاری کے الزام میں عمرقید کی سزا بھی سنائی۔ عمر قید کی سزا پانے والے سہولت کاروں میں ارشد محمود ، فضل، شاہ رخ  اورعلی احمد  شامل ہیں جبکہ  حماد صدیقی اور علی حسن قادری  کو اشتہاری قرار دیا گیا۔

اے ٹی سی کراچی نے عدم شواہد کی بناء پر ایم کیو ایم کے رہنما روَف صدیقی سمیت 4افراد  کو بری کردیا۔ بری ہونے والوں  میں ادیب خانم ،علی حسن قادری  اورعبد الستار شامل ہیں۔

یادرہے کہ  11 ستمبر2012 کو  ڈھائی سو خاندانوں پر قیامت ٹوٹی جب  بلدیہ میں واقع فیکٹری میں آگ لگنے سے 259افراد زندہ جل گئے۔

12 ستمبر 2012 کو فیکٹری مالکان کے خلاف ہی مقدمہ درج کرلیا گیا تھا۔

کیس کی شروعات سے انجام تک کئی موڑ آئے۔سانحہ بلدیہ کیس میں آٹھ سال  میں 171 سماعتیں ہوئیں۔

14 ستمبر2014  کو فیکٹری مالکان عبدالعزیز بھائلہ، ارشد بھائلہ اور راشد بھائلہ نے سندھ ہائیکورٹ سے ضمانت حاصل کی اور  دبئی چلےگئے۔

عوامی دباؤ بڑھا تو سندھ حکومت نےسندھ ہائیکورٹ کےسابق جج زاہد قربان کی سربراہی میں تحقیقاتی ٹریبونل قائم کرديا۔ تحقیقاتی ٹربیونل نے واقعے کو شارٹ سرکٹ کا نتیجہ قرار دے ديا۔

آگ  لگانے کی اہم وجہ فیکٹری مالکان سے مانگا گیا بھتہ تھا،اس واقعے کا  بھانڈا اُس وقت پھوٹا جب ایم کیو ایم کارکن رضوان قریشی کے خلاف تفتیشی رپورٹ 7 فروری 2015 کو عدالت میں جمع کی گئی ۔

تفتیشی رپورٹ میں انکشاف ہوا کہ  بلديہ فیکٹری میں آگ لگی نہیں  بلکہ لگائی گئی تھی۔

23 فروری 2016 کو ڈی آئی جی سلطان خواجہ کی سربراہی میں جے آئی ٹی نے بھی یہی رپورٹ دی اور   مقدمے  میں دہشت گردی کی دفعات شامل کرنے کی بھی سفارش کردی۔

11 مارچ 2017 کو مقدمہ انسداد دہشت گردی عدالت منتقل کرديا گیا۔

19 ستمبر 2019 کو مقدمہ میں اس وقت اہم موڑ آيا  جب فیکٹری مالک ارشد بھائلہ نے ویڈیو لنک کے ذریعے بیان ريکارڈ کرایا۔

نومبر 2019  میں استغاثہ کی جانب سے شواہد مکمل ہوگئے، عدالت نے چار سو گواہوں کے بیانات ريکارڈ کیے۔

3 فروری 2020 کو فریقین کے وکلا کے حتمی دلائل کا آغاز ہوا جو رواں ماہ 2 ستمبر کو دلائل مکمل ہونے پر فیصلہ محفوظ کیا گیا تھا۔

سانحہ بلدیہ فیکٹری کیس کا فیصلہ 17 ستمبر کو سنایا جانا تھا تاہم عدالت نے فیصلہ سنائے بغیرسماعت 22 ستمبر تک مؤخر کردی تھی۔