وزیراعلیٰ بلوچستان جام کمال خان کی زیرصدارت ہونے والے اجلاس میں بلوچستان زمیندار ایکشن کمیٹی اور کیسکو حکام کے درمیان منعقدہ مذاکرات کامیاب ہوگئے۔

تفصیلات کے مطابق سی ای او کیسکو نے زرعی ٹیوب ویلوں کی بجلی کی بحالی اور چھ گھنٹہ بجلی کی فراہمی جبکہ زمیندارایکشن کمیٹی نے احتجاج ختم کرنے کا اعلان کردیا۔

اجلاس میں وزیراعلیٰ بلوچستان جام کمال کی ہدایت پر صوبائی وزیرزراعت زمرک خان اچکزئی کی سربراہی میں زمیندار ایکشن کمیٹی کے نمائندوں، کیسکو اور محکمہ توانائی کے حکام پر مشتمل کمیٹی قائم کردی گئی۔

اجلاس میں فیصلہ کیا گیا کہ وزیراعلیٰ بلوچستان کی قائم کردہ کمیٹی کا پہلا اجلاس 4ستمبر بروز جمعہ منعقد ہوگا۔

وزیراعلیٰ بلوچستان نے کہا کہ کمیٹی زرعی ٹیوب ویلوں کے ذمہ کیسکو واجبات، بجلی کے میٹروں کی تنصیب، زرعی ٹیوب ویلوں کی سولرائزیشن سمیت دیگر متعلقہ امور پر سفارشات تیار کرے گی۔

جام کمال نے یہ بھی کہا کہ بلوچستان میں بجلی کا مسئلہ حساس اور سنجیدہ ہے جسے اسلام آباد میں بیٹھ کر نہیں سمجھا جاسکتا جبکہ زمینداروں اور کیسکو کے درمیان اعتماد کی بحالی سے مسائل کے حل میں مدد ملے گی۔

مزید پڑھیں

بلوچستان، جیل مینوئل میں تبدیلی اور اصلاحات کا فیصلہ

بلوچستان حکومت کی جانب سے جیل مینوئل میں تبدیلی اور اصلاحات کا...

وزیراعلیٰ بلوچستان کا کہنا تھا کہ حکومت اور ریاست اور اپنا فائدہ اور نقصان نہیں دیکھتیں بلکہ عوام کی سہولت دیکھ کر منصوبے بناتی ہیں جبکہ ریاست کی ذمہ داری عام آدمی کی فلاح وبہبود ہے، ایسا نظام بنانے کی ضرورت ہے جس سے کیسکو اور زمینداروں کے درمیان اعتماد بحال ہوسکے۔

 جام کمال کا یہ بھی کہنا تھا کہ کیسکو اور زمینداروں کی جانب سے قدم آگے بڑھانے کی ضرورت ہے، بجلی کی بندش مسئلے کا حل نہیں، ابتدائی دوماہ میں کیسکو زرعی ٹیوب ویلوں کو پوری وولٹیج کے ساتھ چھ گھنٹے بجلی فراہم کرے جبکہ زرعی ٹیوب ویلوں پر میٹرنصب کئے جائیں جبکہ زمیندار اپنے ذمہ کے بل باقاعدگی سے ادا کریں۔

وزیراعلیٰ بلوچستان جام کمال کا مزید کہنا تھا کہ بلوچستان حکومت کیسکو اور زمینداروں کے درمیان مسئلہ کے حل میں اپنا کردار ادا کرے گی اور اس حوالے سے وفاقی وزراء اسد عمر اور عمرایوب سے بات کی جائے گی۔