وفاقی وزیر اسد عمر نے کہا ہے کہ کراچی سرکلر ریلوے حکومت کے لئے ایک اہم منصوبہ ہے۔

تفصیلات کے مطابق وفاقی وزیر اسد عمر کی زیر صدارت کراچی سرکلر ریلوے منصوبے کا جائزہ اجلاس ہوا جس کا اعلامیہ بھی جاری کردیا گیا ہے۔

اجلاس کے دوران وفاقی وزیر کی جانب سے منصوبے کے تیسرے مرحلے کیلئے پبلک پرائیویٹ پارٹنر شپ کا نظام واضع کرنے کی ہدایت کردی گئی ہے۔

 وفاقی وزیر کا کہنا تھا کہ سرکلر ریلوے منصوبہ کراچی کے عوام کو جدید ٹرانسپورٹ کی سہولت مہیا کرے گا اور سرمایہ کاری کیلئے بھی بہت پرکشش منصوبہ ہوگا۔

اسد عمر نے کہا ہے کہ پرائیویٹ سیکٹر کو منصوبے میں شمولیت کیلئے ضروری اقدامات کا فوری آغاز کیا جائے گا اور کراچی سرکلر ریلوے کی تعمیر 2023 کے وسط تک مکمل کی جائے گی۔

وزارت منصوبہ بندی و خصوصی اقدامات کے حوالے سے اعلامیےمیں بتایا گیا ہے کہ کراچی سرکلر ریلوے منصوبے کے مختلف مراحل پر کام کا آغاز ہوچکا ہے۔

 اعلامیے کے مطابق ہر مرحلے کی بروقت تکمیل کو یقینی بنایا جائے گا اور اس ضمن میں وزارت ریلوے، سندھ حکومت کے ساتھ مسلسل رابطے میں ہے۔

 اعلامیہ میں بتایا گیا ہے کہ مختلف مقامات پر انڈر پاسز پر بھی کام کا آغاز جلد متوقع ہے۔