وزیر خارجہ شاہ محمود قریشی کا کہنا ہے کہ افغانستان میں قیام امن پورے خطے میں امن و استحکام کے حوالے سے ناگزیر ہے ۔

تفصیلات کے مطابق  افغانستان کے لیے نامزد پاکستانی سفیر منصور احمد خان کی وزارت خارجہ میں وزیر خارجہ شاہ محمود قریشی سے ملاقات  ہوئی۔

ملاقات میں پاک افغان تعلقات، افغان امن عمل سمیت مختلف امور پر تبادلہ خیال کیا گیا ۔

وزیر خارجہ نے بطور سفیر افغانستان نامزدگی پر منصور احمد خان کو مبارکباد پیش کرتے ہوئے کہا کہ  آپ کو یہ نئی ذمہ داریاں، آپ کے شاندار سروس ریکارڈ کو پیش نظر رکھتے ہوئے سونپی گئی ہیں ۔

شاہ محمود قریشی نے کہا کہ  آپ ایسے وقت میں بطور سفیر اپنی ذمہ داریاں سنبھالنے جا رہے ہیں جب پاکستان کو داخلی اور خارجی طور پر بہت سے چیلنجز کا سامنا ہے۔

انہوں نے کہا کہ آپ جیسے وسیع تجربےکے حامل سفارت کار کی بطور سفیر تعیناتی سے پاک افغان دو طرفہ تعلقات کو مزید مستحکم بنانے میں مدد ملے گی ۔

وزیر خارجہ نے نئے نامزد سفیر کو پیشہ ورانہ امور اور فارن پالیسی ترجیحات کے حوالے سے خصوصی ہدایات بھی دیں۔

نامزد سفیر برائے افغانستان منصور احمد خان نے وزیر خارجہ کی طرف سے کی طرف سے دی جانے والی خصوصی ہدایات پر ان کا شکریہ ادا کیا۔

یاد رہے کہ منصور احمد خان اس سے قبل ویانا میں بطور سفیر اپنی خدمات سرانجام دے چکے ہیں۔