لائن آف کنٹرول ( ایل او سی) پر بھارتی فوج کی جانب سے سیز فائر کی خلاف ورزی کے نتیجے میں پاک فوج کے سپاہی سمیت دو افراد شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق  لائن آف کنٹرول ( ایل او سی) پر بھارتی فوج  نے سیز فائر کی خلاف ورزی  کرتے ہوئے  بروہ اور ٹانڈار سیکٹرز میں سویلین آبادی کو نشانہ بنایا۔

آئی ایس پی آر کا کہنا ہے کہ فائرنگ کے شدید تبادلے کے دوران بہادری سے لڑتے ہوئے پاک فوج کے سپاہی شفیق نے جام شہادت نوش کیا۔

اس کے علاوہ بھارتی فوج کی فائرنگ سے  15 سالہ بچہ  بھی شہید ہوا جبکہ چار افراد زخمی  بھی ہوئے۔ زخمیوں میں ایک خاتون اور اسی سالہ بزرگ شہری بھی شامل ہیں۔

آئی ایس پی آر کا کہنا ہے کہ  پاک فوج  نے بھارتی فوج کی بلا اشتعال فائرنگ پر بھرپور جوابی کارروائی کی ہے جس میں  بھارتی فوج کے جانی و مالی نقصان کی اطلاعات ہیں۔