جعلی اکاونٹس کے کیسز میں نیب افسران کو خطرات لاحق ہونے لگے ہیں جس کے بعد حکومت سے سیکورٹی مانگ لی گئی ہے۔

تفصیلات کے مطابق جعلی اکاونٹس کے کیسز میں تحقیقات میں شامل نیب نے اپنی عمارت اور پراسیکیوشن ٹیم کیلئے سیکورٹی مانگ لی ہے۔

اس ضمن میں نیب کی جانب سے سیکرٹری داخلہ کو سیکورٹی فراہم کرنے کیلئے مراسلہ بھیج دیا گیا ہے۔

نیب کی جانب سے سیکرٹری داخلہ سے درخواست کی گئی ہے کہ موجودہ سیکورٹی صورتحال میں نیب افسران اورعمارت کو خطرات ہیں اسی لئے نیب افسران اور عمارت کیلئے سیکورٹی کے انتظامات مزید سخت کئے جائیں۔

نیب راولپنڈی دفتر اور نیب ہیڈکوارٹر عمارت کیلئے سیکورٹی انتظامات کئے جائیں اور نیب کی پراسیکیوشن ٹیم کو دفتر سے احتساب عدالت پہنچانے کیلئے رینجرز اہلکار تعینات کئے جائیں۔

یاد رہے کہ سپریم کورٹ کے حکم پر جعلی اکاؤنٹس کے معاملے میں نیب مختلف انکوائریاں کررہا ہے جبکہ جعلی اکاؤنٹس کیس میں نیب پانچ ریفرنس دائر کرچکا ہے۔