وزیر خارجہ شاہ محمود قریشی نے کہا ہے کہ پاکستان اور ملائشیا کے مابین گہرے برادرانہ تعلقات ہیں۔

تفصیلات کے مطابق وزیر خارجہ مخدوم شاہ محمود قریشی کا ملیشیا کے وزیر خارجہ داتو سری حسام الدین حسین کے ساتھ ٹیلیفونک رابطہ ہوا ہے۔

دوران رابطہ دونوں وزرائے خارجہ کے مابین دو طرفہ تعلقات اور مختلف شعبہ جات میں دو طرفہ تعاون کے فروغ کے حوالے سے تفصیلی تبادلہء خیال کیا گیا ہے۔

دونوں وزرائے خارجہ نے پاکستان اور ملائشیا کے مابین پائے جانے والے دو طرفہ تعلقات پر اظہار اطمینان کرتے ہوئے، کورونا وبا کے دوران دو طرفہ مثالی تعاون کو سراہا ہے۔

دونوں وزرائے خارجہ کا دو طرفہ تعلقات اور روابط کے فروغ کیلئے باہمی مشاورت جاری رکھنے پر اتفاق بھی کیا گیا ہے۔

وزیر خارجہ نے دسمبر 2020 میں ملائشیاء میں ہونیوالے، ایشیا پیسیفک اقتصادی تعاون کے اجلاس کے کامیاب انعقاد کیلئے نیک تمناؤں کا اظہار کیا ہے۔

علاوہ ازیں وزیر خارجہ نے کورونا وبا کے دوران ملائشیا میں مقیم پاکستانی کمیونٹی کا خصوصی خیال رکھنے پر ملیشین وزیر خارجہ کا شکریہ بھی ادا کیا ہے۔

رابطے کے متعلق وزیر خارجہ کا کہنا تھا کہ پاکستان، ملائشیا کے ساتھ معیشت، تجارت، تعلیم، سائنس اور ٹیکنالوجی سمیت باہمی دلچسپی کے مختلف شعبوں میں اسٹریٹیجک شراکت داری کے فروغ کیلئے پرعزم ہے۔