وزیر خارجہ شاہ محمود قریشی کا کہنا ہے کہ  گستاخانہ خاکوں پر مسلم امہ میں غم و غصہ ہے۔

 ملتان  میں میڈیا سے گفتگو  کرتے ہوئے وزیر خارجہ شاہ محمود قریشی  کا کہنا تھا کہ   گستاخانہ خاکوں کے معاملے پر قراداد منظور کی گئی ہے۔

شاہ محمود قریشی نے  کہا کہ   حکومت پاکستان عوام کے جذبات سے باخبر اور ترجمانی کر رہی ہے۔پاکستان نے یہ فیصلہ کیا ہے کہ او آئی سی کے وزرائے خارجہ کے اجلاس میں گستاخانہ خاکوں کے معاملے پر مشترکہ لائحہ عمل سامنے لایا جائے گا۔

کوئٹہ اور پشاور میں دہشت گردی کے واقعات  پر ان کا کہنا تھا کہ    کچھ ایسی قوتیں موجود ہیں جو پاکستان میں امن نہیں دیکھنا چاہتیں۔

وزیر خارجہ نے کہا کہ دہشت گردی کی لہر پر وفاقی حکومت نے صوبائی حکومت کو احتیاطی تدابیر پر عمل کی ہدایت کی ہے۔  قوم نے پہلے بھی دہشت گردی پر قابو پایا آئندہ بھی انہیں شکست دیں گے۔

شاہ محمود قریشی نے کہا کہ  اس میں کوئی شک نہیں کہ دہشت گردوں کے سہولت کار ہوتے ہیں۔  پاکستان میں ہونے والے واقعات سہولت کاروں کے بغیر ممکن نہیں  ہیں۔

مہنگائی سے متعلق با ت کرتے ہوئے انہونے کہا کہ مہنگائی بے شک ہے، اس پر قابو پانے کے لیے اقدامات اٹھائے جا رہے ہیں۔  گندم کی امپورٹ کی جا رہی ہے، جس سے کمی پوری ہوگی۔   فلور ملز کے لیے کوٹہ بڑھانے کا فیصلہ کیا گیا ہے۔

وزیر خارجہ نے کہا کہ  سندھ میں بھی آٹے کی قیمتوں کو قابو پانے کے لیے اقدامات اٹھائے ج رہے ہیں۔ چینی کی قیمتوں پر قابو پانے کے لیے بھی اقدامات اٹھائے جا رہے ہیں۔