پیپلز پارٹی کے رہنماء راشد حسین ربانی کی نماز جنازہ کلفٹن میں ادا کر دی گئی۔

تفصیلات کے مطابق پیپلزپارٹی رہنما راشد ربانی کی نماز جنازہ عمر شریف پارک میں ادا کی گئی جس کے بعد ان کی میت کو تدفین کے لیے سخی حسن قبرستان منتقل کیا گیا۔

پیپلزپارٹی رہنما راشد ربانی کی نمازجنازہ مولانا مفتی منیب الرحمان نے پڑھائی۔

نماز جنازہ میں وزیراعلی مراد علی شاہ، نثار کھوڑو، سینیٹر رضا ربانی، سعید غنی، وقار مہدی نے شرکت کی جبکہ نماز جنازہ میں ڈاکٹر فاروق ستار، پی ٹی آئی کے خرم شیر زمان، شہزاد قریشی، مسلم لیگ فنکشنل کے سردار رحیم ، راشد ربانی کی نماز جنازہ میں پیپلز پارٹی کے کارکنوں سمیت شہریوں کی بڑی تعداد شریک ہوئے۔

یاد رہے اس سے قبل پاکستان پیپلزپارٹی کے سینئر رہنما و وزیراعلیٰ سندھ کے معاون خصوصی راشد ربانی کورونا کے باعث انتقال کرگئے۔

اہل خانہ نے تصدیق کرتے ہوئے کہا کہ راشد ربانی کئی دنوں سے نجی اسپتال میں وینٹی لیٹر پر تھے اور آج ان کا انتقال ہوگیا۔

وزیراعلیٰ سندھ سید مراد علی شاہ  نے بھی سینئر پارٹی رہنما راشد ربانی کے انتقال پر گہرے دکھ کا اظہار کرتے ہوئے کہا کہ راشد ربانی کا شمار محترمہ بینظیر بھٹو کے قریبی ساتھیوں میں ہوتا تھا۔

وزیراعلیٰ سندھ نے کہا کہ  مرحوم کی جمہوریت  کے لیے خدمات ہمیشہ یاد رکھی جائیں گی۔

واضح رہے کہ 6 مئی کو وزیراعلیٰ سندھ مراد علی شاہ کے معاون خصوصی برائے سیاسی امور راشد ربانی کورونا وائرس کا شکار ہوگئے تھے۔