وزارت داخلہ کی جانب سے بلیک لسٹ پاسپورٹس کے حوالے سے اہم اقدام اٹھاتے ہوئے  بلیک لسٹ کیٹیگری بی میں سے 5 ہزار 8 سو 7 افراد نکالنے کی سفارش کردی گئی ہے۔

تفصیلات کےمطابق جائزہ کمیٹی کا اجلاس 4 سال کی تاخیر سے وزیر داخلہ کا نوٹس لینے کے بعد منعقد ہوا ہے جس میں بلیک لسٹ سے افراد کو نکالنے کا فیصلہ تمام متعلقہ محکموں کی مشاورت سے کیا گیا ہے۔

اجلاس کے دوران وزیر داخلہ اعجاز شاہ نے ہدایت کی ہے کہ پاسپورٹ اینڈ امیگریشن ڈائریکٹریٹ شہریوں کی سہولت کے ہر ممکن اقدامات کریں۔

یاد رہے کہ بلیک لسٹ میں مجموعی طور پر 42 ہزار 7 سو 25 افراد موجود ہیں جبکہ جائزہ کمیٹی کے اجلاس میں میرٹ پر بلیک لسٹ قرار دئیے گئے افراد کا نام نکالنے پر غور کیا جائیگا اور جائزہ کمیٹی میں بلیک لسٹ قرار دئیے گئے افراد کا نام نکالنے کے لیے متعلقہ اداروں سے مشاورت کی جائے گی۔

خیال رہے کہ وزیر داخلہ اعجاز شاہ جائزہ کی ہدایت پر کمیٹی کا اجلاس سال میں 2 بار باقاعدگی سے منعقد ہوگا۔