پاکستان کے گرے لسٹ سے بلیک لسٹ میں جانے کا  کوئی امکان نہیں رہا۔

ذرائع کے مطابق  فنانشل ایکشن ٹاسک فورس (ایف اے ٹی ایف ) میں پاکستان کے گرے لسٹ سے بلیک لسٹ میں جانے کا امکان نہیں رہا تاہم آج شروع ہونے والی پلانری میں پاکستان گرے لسٹ سے باہر بھی نہیں آ سکے گا۔

ذرائع کا کہنا ہے کہ ایف اے ٹی ایف کے پاکستان کو کمپلائنس کے لیے دیے  گئے27 ایکشن پوائنٹس میں سے 6 پر عملدرآمد باقی ہے۔

ذرائع کا مزید کہنا ہے کہ پاکستان اینٹی منی لانڈرنگ کے حوالے سے ایف اے ٹی ایف کے زیادہ تر ایکشن پوائنٹس پر عملدرآمد مکمل کر چکا ہے ۔

ایف اے ٹی ایف کے پاکستان کو فراہم کردہ ایکشن پوائنٹس میں بقیہ ایکشن پوائنٹس میں سے زیادہ تر اینٹی ٹیرر فنانسنگ سے متعقلہ ہیں۔  ایف اے ٹی ایف کے انٹرنیشنل کوآپریشن ریویو گروپ کی رپورٹ میں پاکستان کے 21 ایکشن پوائنٹس پر عملدرآمد تسلیم کیا گیا ہے۔

ذرائع کا کہنا ہےکہ آئندہ برس کی پہلی ششماہی میں پاکستان ایف اے ٹی ایف کی گرے لسٹ سے باہر نکال لیا جائے گا اور فروری کی پلانری میں پاکستان کو ان سائیٹ وزٹ مل سکتا ہے جس میں ایف اے ٹی ایف کے اراکین پاکستان کا دورہ کر کہ ایکشن پوائنٹس پر عملدرآمد کا جائزہ لیں گے۔

واضح رہے کہ  ایف اے ٹی ایف کے حوالے سے پاکستان میں 16 مرتبہ قانون سازی کی گئی ہے۔

آئندہ برس کی پہلی ششماہی میں فنانشل ایکشن ٹاسک فورس بھارت کی میوچل ایویلیوایشن کرے گا جس میں 44بھارتی بینکوں کے منی لانڈرنگ اور ٹیرر فنانسنگ میں ملوث ہونے کاجائزہ لینےکاامکانات ہیں۔