ملک میں مختلف کارروائیوں کے دوران بھاری مقدار میں منشیات برآمد کی گئی ہے۔

تفصیلات کے مطابق اسلام آباد میں اے این ایف کی گزشتہ ایک ماہ میں 40 مختلف کارروائیاں کی گئی ہیں جس کے نتیجے میں 1.951 ٹن منشیات برآمد کی گئی ہے۔

اس ضمن میں ترجمان اے این ایف کا کہنا ہے کہ منشیات کے کاروبار میں ملوث 6 غیر ملکیوں اور 7 خواتین سمیت 46 ملزمان گرفتار اور اسمگلنگ میں استعمال ہونے والی 20 گاڑیاں بھی قبضے میں لے لی گئیں ہیں۔

ترجمان کا کہنا ہے کہ بر آمد شدہ منشیات میں 45.96کلوگرام ہیروئن,1815.3کلو گرام چرس,61.155کلو گرام افیون اور 18.455 کلو گرام میتھ ایمفیٹا مائن(آئس) 2300 الپرازولم گولیاں اور10کلو گرام مشکوک پاؤڈر شامل ہیں۔

ترجمان نے مزید بتایا ہے کہ برآمد شدہ منشیات کی بین الاقوامی مالیت 73.297ملین امریکی ڈالر بنتی ہے۔

دوسری جانب اے ایس ایف کی ایئرپورٹ پر کارروائی کرتے ہوئے منشیات اسمگل کرنے کی کوشش ناکام بنادی ہے۔

اے ایس ایف کی جانب سے ملزمان سے مسافر محمد علی کے قبضہ سے ایک کلو گرام حشیش برآمد کر لی گئی جبکہ مسافر نے حشیش جوتوں میں چھپا کر رکھی ہوئی تھی۔

ملزم کو حراست میں لے کر اینٹی نارکوٹیکس فورس کے حوالے کر دیا گیا جبکہ خیال رہے کہمسافر محمد علی جنوبی وزیرستان کا رہائشی ہے۔