گورنر سندھ عمران اسماعیل کا کہنا ہے کہ گرین لائن بسیں 7 سے 8 ماہ میں کراچی پہنچ جائیں گی ۔

تفصیلات کے مطابق  گورنر سندھ عمران اسماعیل کی زیر صدارت اعلیٰ  سطحی اجلاس ہوا ۔

اجلاس میں اراکین صوبائی اسمبلی فردوس شمیم نقوی، حلیم عادل شیخ ، خرم شیر زمان، خواجہ اظہار الحسن اور نصرت سحر عباسی شریک ہوئے۔

اجلاس میں  وفاقی فنڈنگ سے کراچی میں جاری ترقیاتی منصوبے زیر غور آئے۔

اجلاس میں ایس آئی ڈی سی ایل  حکام  نے گورنر سندھ کو  جاری ترقیاتی منصوبوں پر بریفنگ دی۔

گورنر سندھ نے کہا کہ  گرین لائن کی بسوں کا ٹینڈر مکمل ہوچکا ہے، ایک سے ڈیڑھ ماہ میں ایوارڈ کر دیا جائے گا  اور  گرین لائن بسیں 7 سے 8 ماہ میں کراچی پہنچ جائیں گی ۔

عمران اسماعیل نے کہا کہ 50  فائر ٹینڈر اور 2 باؤزر زبھی اگلے سال مارچ تک کے ایم سی کے حوالے کردیے جائیں  گے ۔

انہوں نے مزید کہا کہ وفاقی حکومت کی جانب سے تھر میں 42 آر او پلانٹس لگائے جا رہے ہیں ۔ آر او پلانٹس کا ٹینڈر پروسیس شروع ہو گیا ہے ۔