پاکستان تحریک انصاف کے سینیٹر  فیصل جاوید  پاک-فرانسیسی پارلیمانی فرینڈشپ گروپ کی سربراہی  سے مستعفی ہوگئے۔

تفصیلات کے مطابق  فرانسیسی صدر کی جانب سے رسالت مآب خاتم النبین حضرت محمد مصطفیٰ ﷺکے حوالے سے توہین آمیز خاکوں کی اشاعت کی حمایت پر  پاکستان تحریک انصاف کے سینٹر فیصل جاوید نے شدید احتجاج کرتے ہوئے  پاک-فرانسیسی پارلیمانی فرینڈشپ گروپ کی سربراہی چھوڑنے کا اعلان کردیا۔

 سینیٹر فیصل جاوید نے اپنا استعفیٰ چیئرمین سینٹ کو بھجوا دیا ۔

سینیٹر فیصل جاوید نے کہا کہ  فرانسیسی صدر نے رسالت مآب خاتم النبین حضرت محمد مصطفیٰ ﷺ کے خلاف توہین آمیز خاکوں کی حمایت کی، فرانسیسی صدر کی جانب سے اس قبیح عمل کی حوصلہ افزائی سے یورپ میں اسلاموفوبیا کو مزید ہوا ملے گی۔

فیصل جاوید نے مزید کہا کہ  وزیراعظم عمران خان نے جنرل اسمبلی سمیت تمام عالمی فورمز پر اسلاموفوبیا کا معاملہ اٹھایا تھا۔ فرانسیسی صدر کے اقدام سے انسانیت تقسیم کی شکار ہوگی اور شدت پسندی بڑھے گی۔

انہوں نے کہا کہ  نازی ازم کی طرح مقدس ہستیوں کی ہتک و توہین کے خلاف عالمی سطح پر قانون سازی وقت کا تقاضا ہے۔ وزیراعظم عمران خان نے دنیا پر واضح کیا ہے کہ فرانسیسی صدر کے اقدام سے انسانیت کو اس نقصان کا اندیشہ ہے جو نازی یا نسل پرست نہ پہنچا سکے۔

سینیٹر فیصل جاوید نے کہا کہ  وزیراعظم فرانسیسی صدر کے اقدام پر واضح اور دوٹوک مؤقف اپنا چکے ہیں۔ اظہارِ رائے کی آزادی کے نام پر کروڑوں مسلمانوں کے جذبات سے کھیلنے کی فرانسیسی منطق ناقابل قبول ہے۔

انہوں نے کہا کہ فرانسیسی حکومت کے اس رویے کے خلاف میں فوری طور پر پاک-فرانسیسی فرینڈشپ گروپ کی سربراہی سے مستعفی ہوتا ہوں۔ میری پرزور سفارش ہے کہ پارلیمان کی سطح پر قائم اس گروپ کو مکمل طور پر تحلیل کردیا جائے۔

سینیٹر فیصل جاوید نے کہا کہ  ناموس رسالت ﷺکے حوالے سے متفقہ ردعمل ہماری مذہبی و اخلاقی ذمہ داری ہے۔