پاکستان مسلم لیگ ن کے راہنما خواجہ محمد آصف نے کہا ہے کہ اب کوئی حربہ بھی حکومت کو بچا نہیں سکتا پی ڈی ایم کی باقی سیاسی قیادت سے مل کر جمہوریت اور ووٹ کی عزت کو بحال کرنے کے لئے جنگ لڑیں گے۔

تفصیلات کے مطابق سیالکوٹ کے مقامی ہوٹل میں ورکروں سے خطاب کرتے ہوئے پاکستان مسلم لیگ ن کے راہنما خواجہ محمد آصف نے کہا ہے کہ عمران خان کا اصل چہرہ سب کے سامنے آ چکا ہے۔

خواجہ آصف کا کہنا ہے کہ جس تحریک کا آغاز جمعہ کے روز ہو رہا ہے ن لیگ اسکا ہراول دستہ ہے جس اتحاد اور جذبے کیساتھ جس تحریک کا آغاز کر رہے ہیں پورے ملک میں اس کی پذیرائی ہو رہی ہے، پی ڈی ایم کی باقی سیاسی قیادت سے مل کر جمہوریت اور ووٹ کی عزت کو بحال کرنے کیلیے اس جنگ کو استعمال کرینگے۔

انہوں نے کہا بڑے بڑے حربے استعمال کیے جارہے ہیں لیکن کوئی رکاوٹ یا ہر بہ اس حکومت کے خاتمے کو اب روک نہیں سکتا ہے۔

خواجہ آصف نے کہا بھٹو خاندان کو نکال کر کسی نے اتنی قربانیاں نہیں دیں جتنی اس خاندان نے دیں ہیں، ماضی میں ہم نے غلطیاں کی لیکن ایک شخص نے نظریاتی سیاست کا قدم اٹھایا ہے جبکہ نواز شریف اپنی ذاتی اقتدار کی جنگ نہیں لڑ رہا وہ عوام کے اقتدار کی جنگ لڑ رہا ہے کیونکہ ستر سال میں بار بار آئین پامال کیا گیا جب تک آئین کی حکمرانی قائم نہیں ہوگی یہ تحریک جاری رہے گی۔