یاسین ملک کی اہلیہ مشعال ملک نے کہا ہے کہ کشمیر پاکستان سے جدا نہیں ہوسکتا، کشمیر پاکستان کی شہ رگ ہے۔

تفصیلات کے مطابق یاسین ملک کی اہلیہ مشعال ملک نے یکجہتی ریلی کے شرکاء سے خطاب کرتے ہوئے کہا کہ بھارت کے غنڈے کسی بھی صورت کشمیریوں کو دبانے میں کامیاب نہیں ہوسکتے۔

مشعال ملک نے کہا کہ مسلمانوں نے آزادی کیلئے لاکھوں انسانی جانوں کے نذرانے دیئے جبکہ مساجد کی جگہ کشمیر اور بھارت میں مندر بنائے جارہے ہیں۔

یاسین ملک کی اہلیہ نے یہ بھی کہا کہ آر ایس ایس کے غنڈوں نے آج کے دن مسلمانوں کا قتل عام کیا جبکہ آر ایس ایس کے غنڈوں نے مسلمانوں پر مظالم کی تاریخ رقم کی تھی۔

مشعال ملک کا کہنا تھا کہ حریت رہنماوں پر وحشیانہ تشدد اورمسلمانوں کی نسل کشی ہورہی ہے جبکہ سماجی کارکنوں پرتشدد اور نمائندوں کو بھی سرعام اٹھایا جارہا ہے۔

یاسین ملک کی اہلیہ مشعال ملک نے مزید کہا کہ بھارت میں بھی سچ بولنے والے نہ صحافی محفوظ نہ سماجی کارکن محفوظ ہیں، کشمیریوں کی حق وسچ کی  کی آواز بھارت دبانے میں ناکام چکا ہے۔

واضح رہے اس سے قبل حریت رہنما یاسین ملک کی اہلیہ نے کہا تھا کہ بھارتی فورسز سرچ آپریشن کے نام پر کشمیری نوجوانوں کو قتل اور گرفتار کررہی ہے، سری نگر کے علاقے رامباغ میں دو کشمیری نوجوانوں کے قتل کی مذمت کرتے ہیں۔

مشعال ملک نے یہ بھی کہا تھا کہ بھارتی فورسز کے وحشیانہ ہتھکنڈے بہادر کشمیری عوام کی ہمت کم نہیں کریں گے جبکہ بھارتی سرکار کی غیر قانونی حرکتوں اور مظالم کی نئی لہر سے حق خود ارادیت تحریک مزید ابھرے گی۔