مشیر خزانہ ڈاکٹرعبدالحفیظ شیخ نے کہا ہے کہ ایسی پالیسیاں لارہے ہیں جس سے ملک کے اندر روزگار پیدا ہوں تاہم معاشی صورت حال میں بہتری اور برآمدات میں اضافہ ہورہا ہے۔

تفصیلات کے مطابق وزیر اطلاعات و نشریات سینیٹر شبلی فراز اور مشیر خزانہ ڈاکٹر عبدالحفیظ شیخ نے میڈیا بریفنگ دیتے ہوئے کہا ہے کہ وزیراعظم عمران خان کی صدارت میں وفاقی کابینہ کا اجلاس میں ایجنڈے کے نکات پرغور کیا گیا ہے۔

انہوں نے بتایا کہ معاشی ترقی کے لئے کاروباری طبقے کو مراعات دی گئیں ہیں اور ملک میں موجود معاشی بحرانی کیفیت کی وجہ سے آئی ایم ایف کے پاس جانا پڑا ہے۔

ان کا کہنا تھا کہ روپے کی قدر بہتر ہورہی ہے اور گذشتہ چار ماہ میں قرضہ نہ لینا حکومت کی بڑی کامیابی ہے۔

قبل ازیں وفاقی وزیر سینیٹر شبلی فراز نے کہا کہ معاشی اشاریے مثبت سمت پر جار ہے ہیں، اسٹاک ایکسچینج، غیر ملکی سرمایہ کاری، لارج اسکیل مینو فیکچرنگ سمیت ہر شعبے میں بہتری آرہی ہے۔

انہوں نے کہا کہ وزیراعظم کا ہدف ہے کہ روزگار کے مواقع پیدا ہوں ،ملک میں خوشحالی آئے اور حالات بہتری کی جانب گامزن ہوں ۔

انہوں نے کہا کہ کوویڈ19کی دوسری لہر آچکی ہے اس میں ہم نے بہتر احتیاط کرنا ہوگی۔