کرتار پور راہدری کے خلاف بھارتی بے بنیاد اور غلط پروپیگنڈا کو پاکستان سمیت پاکستان سکھ پربھاندک کمیٹی نے بھی واضح طور پر مسترد کردیا ہے۔

ترجمان دفتر خارجہ زاہد حفیظ چوہدری نے کہا ہے کہ بھارتی حکومت کی طرف سے بدنیتی پر مبنی پروپیگنڈا امن راہدری کو بدنام کرنے کی کوشش ہے کیونکہ بھارتی پروپیگنڈے کا مقصد بھارت میں ہندوتوا سے متاثر بی جے پی کا مذہبی انتشار پھیلانا ہے۔

انہوں نے کہا ہے کہ بھارتی حکومت کے دعوے بھارت میں اقلیتوں کے حقوق کی پامالیوں سے توجہ ہٹانے کی کوشش ہے۔

ترجمان نے واضح طور پر بتایا ہے کہ پاکستان سکھ گردوارہ پربھاندک کمیٹی ریحت کے مطابق کرتار پور سمیت گردوارہ صاحبان میں رسومات انجام دینے کی ذمہ دار ہے جبکہ پروجیکٹ مینجمنٹ یونٹ کا قیام گردوارہ پربھاندک کمیٹی کی سہولت کے لیے تشکیل دیا گیا ہے۔

انہوں نے مزید بتایا ہے کہ گردوارہ کرتار پور صاحب کے معاملات کو پربھاندک کمیٹی سے لیکر کر پی ایم یو کو دینے سے متعلق پراپیگنڈا حقائق سے منافی ہے۔

ترجمان دفتر خارجہ زاہد حفیظ چوہدری نے بتایا ہے کہ کرتار پور راہدری منصوبے کو ریکارڈ وقت میں مکمل کرنے اور سکھ یاتریوں کو فراہم کی جانے والی سہولیات سکھ برادری سمیت پوری دنیا سراہ رہی ہے۔

بھارت کو مشورہ ہے کہ گمراہ کن پروپیگنڈا کرنے کی بجائے اپنی اقلیتوں اور انکی عبادت گاہوں کے تحفظ کے لیے اقدامات کرے۔