پاکستان میں چین کے نومنتخب سفیر نے کہا ہے کہ چین پاکستان میں صنعتی ، زراعت اور سماجی شعبوں میں تعاون اور وسعت دینے کیلئے کوشاں ہے۔

تفصیلات کے مطابق پاکستان میں چین کے نومنتخب سفیر نونگ رونگ کی چیئرمین سی پیک اتھارٹی عاصم سلیم باجوہ سے تعمیری ملاقات ہوئی ہے۔

Had a productive meeting with Chairman CPEC Authority @AsimSBajwa. Highly appreciate the work by the CPEC Authority. Great potential in Phase II of CPEC cooperation. More joint efforts ahead between China&Pakistan! pic.twitter.com/GVx4QffO5s

— Nong Rong (@AmbNong) November 6, 2020

 ملاقات میں چین پاکستان تعلقات اور سی پیک کے حوالے سے تبادلہ خیال کیا گیا ہے اور ساتھ ہی چیئرمین سی پیک اتھارٹی نے چینی سفیر نونگ کو عہدہ سنبھالنے پر مبارکباد بھی دی ہے۔

ملاقات کے دوران چینی سفیر کی جانب سے یقین دہانی کرائی گئی ہے کہ سی پیک کے لیئے مزید پاک چین مشترکہ کوششیں سامنے آنے والی ہیں۔

عاصم سلیم باجوہ (ر) نے کہا ہے کہ سی پیک کے باعث چین اور پاکستان کے مابین دوستی وقت کے ساتھ ساتھ مزید مضبوطی ہوگی ۔

انہوں نے واضح کیا ہے کہ چین پاکستان اقتصادی راہداری پاکستان کی تقدیر بدلنے کے لئے ایک اہم منصوبہ ہے تاہم پاکستان چین کے ساتھ تعاون کو مزید تقویت دینے کے لئے تیار ہے تاکہ گوادر پورٹ، انفرااسٹرکچر ، صنعت ، زراعت ، جیسے اہم شعبوں میں باہمی تعاون کے ساتھ مشترکہ طور پر نئی پیشرفت کو فروغ دیا جاسکے۔

یاد رہے کہ دوران ملاقات چینی سفیر نونگ کی جانب سے چین پاکستان تعلقات کے لئے اتھارٹی کے چیئرمین کے تعاون اور حمایت کی تعریف  کی گئی ہے۔