کورونا وائرس کے بڑھتے کیسز کے پیش نظر کراچی کے ضلع وسطی کے کئی علاقوں میں مائیکرو اسمارٹ لاک ڈاؤن نافذ کردیا گیا۔

ضلع وسطی کے ڈپٹی کمشنر کی جانب سے جاری کردہ نوٹیفکیشن کے مطابق ضلع وسطی کے علاقے گلبرگ، نارتھ ناظم آباد، ناظم آباد اور نارتھ کراچی میں مائیکرو اسمارٹ لاک ڈاؤن لگایا گیا ہے۔

نوٹیفکیشن میں کہا گیا ہے کہ مائیکرو اسمارٹ لاک ڈاؤن میں کورونا کیسز سے متعلقہ گلیوں کو بند کیا جائے گا  جبکہ متاثرہ گلیوں میں غیر متعلقہ افراد کا داخلہ ممنوع ہوگا ۔

متعلقہ گلیوں سے رہائشیوں کو باہر نکلتے ہوئے لازمی ماسک پہننا ہوگا۔

واضح رہے کہ  سندھ حکومت  نے لاک ڈاؤن میں کاروبار کے اوقات کار میں تبدیلی کردی ہے۔ اب ہفتہ وار تعطیلات کے تحت صرف ایک روز کاروبار بند رہے گا۔

کمشنر کراچی نے کہا ہے کہ تمام دکانیں اور مارکیٹیں رات آٹھ بجے تک کھولنے کی اجازت ہو گی۔