سندھ حکومت کے ترجمان و مشیر قانون مرتضیٰ وہاب نے کہا ہے کہ کشمور میں پیش آنے والے وحشیانہ واقعے نے پوری قوم کو جھنجھوڑ دیا ہے جبکہ اے ایس آئی محمد بخش نے انسانیت کی مثال قائم کردی ہے۔

سندھ اسمبلی میں میڈیا سے گفتگو کرتے ہوئے ترجمان سندھ حکومت مرتضی وہاب کا کہنا تھا کہ کشمور واقعے کی جتنی مذمت کی جائے کم ہے تاہم اس واقعے مین ملوث ملزمان اور ان کے سہولت کاروں کو مثالی سزا دی جائے گی۔

مرتضی وہاب کا کہنا تھا کہ اس واقعے مین متاثرہ خاتون اور اس کی بچی کی مدد کرنے والے اے ایس آئی محمد بخش نے انسانیت کی مثال قائم کی ہے جس پر سندھ حکومت نہ صرف اے ایس آئی کی احسان مند ہے بلکہ پولیس کا اعلیٰ ترین ایوارڈ دینے کا فیصلہ بھی کیا ہے۔

ان کا کہنا تھا کہ نہ صرف محمد بخش کی بیٹی کے تعلیمی اخراجات اٹھائے جائیں گے بلکہ زیادتی کا شکار ہونے والی بچی کی تعلیم اور علاج کے لیے جہاں جانا پڑا سندھ حکومت اخراجات اٹھائے گی۔

مشیر قانون سندھ نے مطالبہ کیا کہ عدالتیں بھی ان کیسز کی بروقت پیروی کریں تاکہ ملوث ملزمان کو مثالی سزا دی جا سکے۔