پاکستان نے بھارتی وزارت خارجہ کے گلگت بلتستان کے حوالے سے بیان کو مسترد کر دیا۔

تفصیلات کے مطابق ترجمان دفتر خارجہ زاہد حفیظ چوہدری نے اپنے ایک بیان میں کہا کہ بھارتی وزارت خارجہ کا گلگت بلتستان کے بارے میں دیا گیا بیان غیر ذمہ دارانہ ہے۔

ترجمان دفتر خارجہ نے کہا کہ ہندوستان کے پاس اس معاملے پر قانونی ، اخلاقی یا تاریخی طور مداخلت کا کوئی حق نہیں ہے۔

زاہد حفیظ چوہدری نے یہ بھی کہا کہ بھارت تہتر برسوں سے زائد عرصہ سے جموں کشمیر پر غیر قانونی قابض ہے جبکہ جھوٹے اور من گھڑے بھارتی دعوے حقائق تبدیل نہیں کر سکتے۔

ترجمان دفتر خارجہ کا کہنا تھا کہ پاکستان اقوام متحدہ کی سلامتی کونسل کی قراردادوں کے مطابق کشمیر پر اپنے موقف پر قائم ہے۔

زاہد حفیظ چوہدری کا یہ بھی کہنا تھا کہ مسئلہ کشمیر کا واحد حل اقوام متحدہ کے زیر اہتمام آزاد اور غیر جانبدارانہ رائے شماری اور کشمیریوں کے حق خود ارادیت کے حق کے استعمال میں ہے۔

ترجمان دفتر خارجہ زاہد حفیظ چوہدری کا مزید کہنا تھا کہ انتظامی ، سیاسی، اور معاشی اصلاحات گلگت بلتستان کے عوام کا دیرینہ مطالبہ ہے جبکہ بھارت مقبوضہ کشمیر پر غیر قانونی اور زبردستی قبضے کو فی الفور ختم کرے۔